“Günəşli” yatağından hasil olunan neft və qazın həcmi açıqlandı

"Günəşli" yatağında (dayaz sulu hissəsi – red.) işlənmənin əvvəlindən (01 aprel 2025-ci il tarixinə olan məlumata görə - red.) 209,2 mln. ton neft (kondensatla birlikdə) hasil olunub.

TodayPress TV SOCAR-ın məlumatlarına istinadən xəbər verir ki, hesabat dövründə yataqdan 136,5 milyard m3-dən çox qaz hasil olunub.

Məlumata görə, "Günəşli" yatağında, ümumilikdə, 371 quyu qazılıb, onlardan 274 quyu istismardadır.

Qeyd edək ki, “Günəşli” strukturu 1958-1963-ci illərdə seysmik kəşfiyyat işləri nəticəsində müəyyən olunub. 1 nömrəli kəşfiyyat quyusu 1977-ci ildə qazılıb və yatağın tammiqyaslı istismarına başlanılıb.

"Günəşli" yatağından hasil olunan neft yüksək keyfiyyətə malikdir - o, tərkibinə və özlülüyünə görə "Azeri Light" markasına tam uyğundur. "Günəşli" nefti olduqca yüngüldür, onun tərkibində asfalten, qətran və parafinin miqdarı azdır. Şəffaf məhsulların (benzin, kerosin, liqroin, dizel yanacağı və s.) miqdarı 50% təşkil edir.

"Günəşli" yatağı SOCAR-ın "Azneft" İB-in 28 May adına NQÇİ tərəfindən istismar olunur. "Azneft" İB üzrə hasilatın 55 %-dən çoxunu "Günəşli" yatağı verir. Yataqda 14 dərin dəniz özülü fəaliyyət göstərir.