Tətil niyə yorğunluğu aradan qaldırmır?

Tətilə gedib yaxşı yatmasına və dincəlməsinə baxmayaraq evə yenə yorğun qayıdan insanların sayı az deyil.

TodayPress TV xəbər verir ki, mütəxəssislər bunun səbəbini yalnız stress və yuxu ilə əlaqələndirməməyi tövsiyə edir.

İstirahət zamanı sinir sistemi stressdən uzaqlaşır, daha çox yuxu və sakitlik bədənin müəyyən qədər bərpa olunmasına kömək edir. Lakin düzgün qidalanmama ilə bağlı problemlər davam edərsə, insan özünü yenə halsız hiss edə bilər.

Tətildə qidalanma rejiminin dəyişməsi, yeməklərin nizamsız olması, restoranlarda daha çox qida qəbul edilməsi, spirtli içkilər və şəkərli məhsulların artması bəzi insanlarda həzm problemlərinə, şişkinliyə və ümumi narahatlığa səbəb ola bilər. Xüsusilə müəyyən qidalara həssaslığı olan şəxslərdə bu amillər vəziyyəti daha da ağırlaşdıra bilər.

Mütəxəssislərin fikrincə, balanslı qidalanma sərt pəhriz və ciddi məhdudiyyətlər demək deyil. Əsas məqsəd kifayət qədər zülal, tərəvəz və yavaş həzm olunan karbohidrat qəbul etmək, qidalanma rejimini qorumaq və həddindən artıq emal olunmuş məhsullardan, fast food-dan uzaq durmaqdır.

Qida dözümsüzlüyündən şübhələnən şəxslər isə özbaşına geniş qida qruplarını rasiondan çıxarmaq əvəzinə, həkim və ya ixtisaslı dietoloqla məsləhətləşməlidirlər. Çünki davamlı yorğunluğun səbəbi yalnız qidalanma olmaya bilər.

Beləliklə, tam bərpa üçün təkcə istirahət deyil, yuxu, stressin azalması, müntəzəm qidalanma və ümumi sağlam həyat tərzinin birlikdə nəzərə alınması vacibdir.

Türkan İsgəndərli

TodayPress TV