Ronaldo ilə bağlı qərar: Mövsümün ilk iki oyununu buraxacaq
Portuqaliyalı ulduz Kriştianu Ronaldo yeni mövsümün startında “Əl-Nəsr”ə kömək edə bilməyəcək.
TodayPress TV xəbər verir ki, Səudiyyə Ərəbistanının “Əl-Yaum” qəzeti Ronaldonun 2026/2027 mövsümünün ilk iki oyununda meydana çıxmayacağını yazıb.
41 yaşlı futbolçu avqustun 15-də “Əl-Fateh”ə qarşı Səudiyyə Ərəbistanı çempionatının ilk tur matçında, üç gün sonra isə Kral Kubokunda “Əl-Diriyah”la görüşdə iştirak etməyəcək.
Ronaldonun uzun müddətdir komandadan uzaqda qalması da diqqət çəkir. Bildirilir ki, futbolçu 6 iyuldan etibarən “Əl-Nəsr”in düşərgəsində olmayıb və məşqlərə qoşulmayıb.
Məlumata görə, Ronaldo dünya çempionatından sonra 21 günlük istirahət etməli idi. Lakin o, həm komandanın xaricdəki təlim-məşq toplanışını, həm də Səudiyyə Ərəbistanına qayıtdıqdan sonrakı məşqləri buraxıb.
Beləliklə, portuqaliyalı ulduzun 32 gündür komandanın məşqlərindən kənarda qaldığı bildirilir.
Qeyd edək ki, “Əl-Nəsr” ötən mövsüm Səudiyyə Ərəbistanı çempionu olub. Komanda yeni mövsümdə titulunu qorumaqla yanaşı, tarixində ilk dəfə AFC Çempionlar Liqasının Elit turnirində qalib olmağı hədəfləyir.
