Dərmanlara ehtiyacı azaldan üsul tapıldı! - Alimlərdən vacib tövsiyələr
Aralıq dənizi pəhrizi müntəzəm fiziki aktivliklə birlikdə tətbiq edildikdə ürək-damar sisteminin sağlamlığını və maddələr mübadiləsini yaxşılaşdırmağa kömək edir.
TodayPress TV xəbər verir ki, bu nəticə "Nutrients" jurnalında dərc olunmuş tədqiqatlar icmalında öz əksini tapıb.
Alimlər 2016-2026-cı illərdə dərc edilmiş klinik və müşahidə xarakterli tədqiqatların nəticələrini təhlil ediblər.
Təhlil göstərib ki, əksər araşdırmalarda Aralıq dənizi pəhrizi ilə müntəzəm fiziki aktivliyin birgə tətbiqi bədən çəkisinin azalması, arterial təzyiqin normallaşması, qanda şəkərin səviyyəsinin və xolesterin göstəricilərinin yaxşılaşması ilə əlaqələndirilib.
Tədqiqatlardan birində sağlam qidalanan və eyni zamanda fiziki cəhətdən aktiv olan iştirakçıların ürək-damar xəstəliklərinin müalicəsində istifadə olunan dərmanlara daha az ehtiyac duyduğu müəyyən edilib.
Tədqiqat müəlliflərinin sözlərinə görə, Aralıq dənizi pəhrizi və fiziki aktivlik orqanizmdə oxşar mexanizmlərə təsir göstərir. Tərəvəz, meyvə, paxlalı bitkilər, tam taxıllı məhsullar, qoz-fındıq və zeytun yağı ilə zəngin qidalanma iltihabı və oksidləşdirici stresi azaltmağa kömək edir. Fiziki aktivlik isə insulinə həssaslığı artırır, qan damarlarının fəaliyyətini yaxşılaşdırır və daxili orqanların ətrafında toplanan piyin azalmasına şərait yaradır.
Bununla belə, tədqiqatçılar bildirirlər ki, mövcud elmi məlumatlar Aralıq dənizi pəhrizi ilə fiziki aktivliyin birlikdə tətbiqinin onların ayrı-ayrılıqda istifadəsindən daha üstün nəticə verdiyini qəti şəkildə söyləməyə hələ kifayət etmir.
