Osman Gündüz: "Bu, ictimai təhlükəsizliyin gücləndirilməsinə xidmət edəcək"

Daxili İşlər Nazirliyinin (DİN) Baş İnformasiya Kommunikasiya İdarəsinin süni intellektin tətbiqi ilə bağlı elan etdiyi genişmiqyaslı tender başa çatır.

TodayPress TV xəbər verir ki, rəqəmsal texnologiyalar üzrə ekspert Osman Gündüz bu tenderi yüksək qiymətləndirib.

Onun sözlərinə görə, layihənin məqsədi yalnız konseptual sənədin hazırlanması ilə məhdudlaşmır, həm də real həllərin işlənməsi və sınaqdan keçirilməsini nəzərdə tutur:

"Diqqətçəkən məqam odur ki, DİN bu istiqamətdə yerli mütəxəssislərə və milli ekspertlərə üstünlük verir. Bu həm yerli potensialın gücləndirilməsi, həm də layihənin ölkə reallıqlarına uyğun icrası baxımından mühüm əhəmiyyət kəsb edir".

Ekspert bildirib ki, tender çərçivəsində polis sistemində süni intellektin tətbiqi üzrə strateji yol xəritəsinin hazırlanması, mövcud rəqəmsal infrastrukturun və informasiya sistemlərinin təhlili, beynəlxalq təcrübənin öyrənilməsi, beynəlxalq konsaltinq qurumu və üç yerli universitetin milli ekspertlərinin iştirakı ilə elmi tədqiqatların aparılması, texniki və hüquqi əsaslandırmaların hazırlanması, müxtəlif açıq mənbələrdən məlumatların toplanması, ilkin emalı və təmizlənməsi, toplanmış datanın süni intellekt modellərinin öyrədilməsi, test edilməsi və performansının qiymətləndirilməsi planlaşdırılır.

“DİN-in bu yanaşması texnoloji infrastrukturu süni intellekt əsasında tam modernləşdirmək niyyətindən xəbər verir. Belə ki, universitetlərlə əməkdaşlıq və beynəlxalq ekspertlərin iştirakı layihəyə elmi güc qatacaq, gələcəkdə isə düzgün qərarların qəbulu üçün elmi əsaslar formalaşdıracaq”.

Osman Gündüz qeyd edib ki, tenderin ehtimal olunan dəyəri 6,6 milyon manat təşkil edir və uğurlu icra olunduğu halda, ictimai təhlükəsizliyin gücləndirilməsi, çevik qərarvermə, məlumatların səmərəli idarəsi və xidmətlərin müasir standartlara uyğunlaşdırılması üçün geniş imkanlar açacaq.

Türkan İsgəndərli