Britaniyanın iki həftəlik baş naziri "çomadanını topladı", tənqid olundu

Böyük Britaniyanın Baş naziri Endi Börnhem vəzifəyə başladıqdan cəmi iki həftə sonra məzuniyyətə çıxıb. Bu qərar ölkə müxalifətinin sərt reaksiyasına səbəb olub.

TodayPress TV xəbər verir ki, bu barədə "The Times" nəşrinə istinadən "RBC-Ukrayna" məlumat yayıb.

Məlumata görə, Börnhem yaxın köməkçilərinin tövsiyəsi ilə məzuniyyətə çıxmağa razılaşıb. Bildirilir ki, Makerfilddə keçirilən əlavə seçkilər zamanı apardığı intensiv seçki kampaniyası və baş nazir vəzifəsinə hazırlıq prosesi onun istirahətə ehtiyac duymasına səbəb olub.

Dauninq Strit baş nazirin ailəsi ilə harada istirahət etdiyini açıqlamayıb. Bununla belə, onun səfəri zamanı şəxsi mühafizəçilərin də yanında olduğu qeyd edilib.

Baş nazirin sözçüsü bildirib ki, hökumətin fəaliyyəti fasiləsiz davam edir:

"Hökumət normal fəaliyyətini davam etdirir. Baş nazir rəsmilərlə əlaqə saxlayır, görüşlər keçirir və hökumətin işi barədə mütəmadi məlumat alır."

Məlumata əsasən, hökumətin ən yüksək vəzifəli üzvlərindən biri olan birinci dövlət katibi Luiz Hey bu həftə hökumətin işini koordinasiya edəcək. Lakin o, baş nazir səlahiyyətlərini icra etməyəcək.

Müxalifətdəki Reform UK Partiyasının lideri Li Anderson isə Börnhemin məzuniyyət qərarını tənqid edib.

Anderson bildirib ki, baş nazir vəzifəyə gəldikdən cəmi iki həftə sonra istirahətə getməsi düzgün addım deyil və bunu hökumətin miqrasiya siyasəti ilə əlaqələndirib.

Qeyd edək ki, Endi Börnhem bir neçə gün əvvəl Ukrayna Prezidenti Volodimir Zelenski ilə də görüş keçirmişdi. Bundan başqa, Britaniya mediasında Rusiyanın yeni baş nazirin qarşısında ciddi xarici siyasət sınaqları yaradacağı barədə də qiymətləndirmələr yer alıb.

Jalə Rövşən