Ramiz Yunus: "Siz təcavüzkar Ermənistanı dəstəklədiniz və Kreml ilə..."

"Bu gün “cəngəllik qanunları” ifadəsi deyildikdə, adətən “hər kəs özünü qorusun”, “hamı yalnız özü üçün”, “öldür, ya da öldürül” və “ən güclünün sağ qalması” kimi anlayışlar nəzərdə tutulur. Bu isə, heç bir prinsip tanımadan, amansız və vəhşi bir mübarizəni ifadə edir. Halbuki “Cəngəllik qanunu” – Redyard Kiplinqin məşhur “Cəngəllik kitabı” əsərində yer alan şeirin adıdır və burada cəngəllikdə yaşamağın nəcib və ədalətli qaydaları təsvir olunur: öz dəstəni qorumaq, zəiflərə yardım etmək və bütün canlılara hörmətlə yanaşmaq". 

TodayPress TV xəbər verir ki, Xəzər Universitetinin siyasi elmlər üzrə professoru Ramiz Yunus bunu öz "Facebook" hesabında yazıb.

O, hazırda dünyada hökm sürən geosiyasi xaosun səbəbini belə izah edib:

"Sovet İttifaqı dağıldıqdan sonra soyuq müharibə də başa çatdı və köhnə dünya nizamı bir anda süquta uğradı. Yeni dünya düzəni isə bu günədək qurulmayıb. Nəticədə dünya hazırda içində olduğu geosiyasi xaosa sürüklənib.

Rusiyanın Ukraynaya qarşı genişmiqyaslı təcavüzü isə bir növ lakmus kağızı rolunu oynadı. Dünya açıq şəkildə Tabaki çaqqalının “Mauqli” cizgi filmində danışdığı "cəngəllik qanunları" ilə yaşamağa başladı – burada nə nəciblik qaldı, nə prinsiplər, nə də demokratiya dəyərlərinin müdafiəsi.

Bəşər tarixi boyunca dünyaya hər zaman pul hökmranlıq edib. Əgər bu, qədim və orta əsrlərdə normal qəbul olunurdusa, XXI əsrdə özünü "azad dünya" adlandıran ABŞ, Avropa İttifaqı (Aİ) və NATO rəhbərlərinin bu qədər satqın, qorxaq və prinsipsiz davranması sadəcə iyrənc və hiddət doğurandır. Bu davranış yalnız qəzəb deyil, eyni zamanda insanda dərin kədər yaradır”.

Professor Rusiya-Ukrayna müharibəsini Qərbin demokratiya dəyərlərinə xəyanəti kimi qiymətləndirir. Belə ki, SSRİ-nin dağılmasından sonra 35 il ərzində Qərb rəsmiləri demokratiya prinsiplərindən riyakarlıqla bəhs etsələr də, postsovet məkanında bu dəyərlərə inanan və Kreml kommunist rejiminə qarşı çıxan insanları satıblar:

“Siz 1992–1994-cü illərdə Birinci Qarabağ müharibəsində Ermənistanın Rusiya dəstəyi ilə ölkəmizə qarşı təcavüz siyasətinə göz yummaqla doğma Azərbaycanıma, şəxsən mənə və mənim kimi on minlərlə insana xəyanət etdiniz. 

2008-ci ilin avqustunda Gürcüstana, gürcü xalqına və bu gün həbsdə olan, taleyinə tamamilə laqeyd qaldığınız sabiq prezident Mixail Saakaşviliyə də xəyanət etdiniz. 

2014-cü ildən etibarən Ukraynaya da xəyanət edirsiniz. Demokratiya dəyərlərinin müdafiəsi adı altında bunu ənənəvi “əncir yarpağı” kimi istifadə edərək davam etdirirsiniz.

Mənim doğma Azərbaycanım isə bütün bu oyunlara baxmayaraq, müqavimət göstərdi və tab gətirdi. Siz demokratiya prinsiplərini ayaqlar altına ataraq təcavüzkar Ermənistanı dəstəklədiniz və Kreml ilə istər Boris Yeltsin, istərsə də Vladimir Putin dövrlərində çirkin biznes əlaqələri qurmağa davam etdiniz.

Ukrayna və onun qəhrəman xalqı da bu savaşda təcavüzkara qarşı dözəcək və qalib gələcək. Çünki onların tərəfində ədalət durur. Ən əsası isə, onlar da Azərbaycan xalqının sahib olduğu eyni motivasiyaya sahibdirlər. Bu, Qərbdə hələ də demokratiya dəyərləri adı ilə spekulyasiya apararaq Ukraynanın arxasınca “şeytanla sövdələşmə” yolları axtaranların niyyətlərinə rəğmən baş verəcək".

Ramiz Yunusun qənaətincə, ABŞ, Aİ və NATO hazırda tarixlərinin ən dərin böhran dövrünü yaşayırlar. Rusiyanın Ukraynaya təcavüzü isə təkcə yeni dünya nizamının deyil, həm də demokratiya dəyərlərinin gələcəyini müəyyən edəcək Rubikon rolunu oynayır (Rubikon – İtaliyanın şimalında kiçik bir çaydır, keçilməsi tarixdə dönüş nöqtəsi hesab olunur – red.):

“Azad dünya” isə hələ də öz yararsızlığını impotent kimi imitasiya etməyə davam edir. Necə ki, yaxın tarixdə Ağ Evdə baş verən görüşdə Ukrayna Prezidenti Volodimir Zelenski bütün o Qərb qorxaqlarını bir araya topladı. Buna görə də postsovet məkanındakı hər kəs anlamalıdır ki, dünya artıq Tabaki çaqqalının “cəngəllik qanunları” ilə yaşayır. Bu səbəbdən illüziyalardan qurtulmağın və “boğulanların xilasının öz əllərində olduğunu” xatırlamağın vaxtıdır".

Siyasətçi sonda böyük ispan memarı Antonio Qaudidən sitat gətirib: 

“Məyus olmamaq üçün illüziyalara qapılmamaq lazımdır".

Qiymət Mahir