Fransa millisində yeni dövr başladı – Sükan Zidanın əlində
Fransa Futbol Federasiyası Zinəddin Zidanın milli komandanın yeni baş məşqçisi təyin olunduğunu rəsmən açıqlayıb.
TodayPress TV xəbər verir ki, 54 yaşlı mütəxəssis bu postda Didye Deşamı əvəzləyib.
Təcrübəli məşqçiylə 2030-cu ilə qədər müqavilə imzalanıb.
Qeyd edək ki, Zidan məşqçilik karyerası ərzində yalnız “Real Madrid” klubunu çalışdırıb. O, “kral klubu” ilə 3 dəfə UEFA Çempionlar Liqası Kubokunu qazanıb. Mütəxəssis, həmçinin “Real”la 2 La Liqa, 2 UEFA Superkuboku, 2 FIFA Klublararası Dünya Çempionatı və 2 İspaniya Superkubokunun qalibi olub.
Xatırladaq ki, Zidanın əvəz etdiyi Didye Deşam 2012-ci ildən Fransa millisini çalışdırırdı. “Xoruzlar” onun rəhbərliyi altında 2018-ci ildə dünya çempionu titulunu qazanıblar. Bundan başqa Fransa yığması AVRO-2016 və DÇ-2022-də finala, DÇ-2026-da isə yarımfinala yüksəlib.
Namiq HUN
