Mədəniyyət naziri kitabxanaçıları attestasiya adı ilə işsiz qoydu – Etibar Əliyev
Sabiq deputat Etibar Əliyev Mədəniyyət Nazirliyinin keçirdiyi attestasiyanı tənqid edib.
TodayPress TV xəbər verir ki, o, nazirliyin kitabxana əməkdaşlarını attestasiyadan keçirməsinə və bunun nəticəsində çoxlu insanın işsiz qalmasına etirazını bildirib.
E.Əliyev qeyd edib ki, cüzi məvaciblə və şəraitsiz mühitdə ömürlərini kitab işinə həsr edən bu insanları formal attestasiya adı ilə işsiz qoymaq ədalətli deyil. O, mədəniyyət naziri Adil Kərimovun kitabxana işindən xəbərsiz olduğunu və bu səbəbdən həmin əməkdaşları anlayamayacağını vurğulayıb:
“Mənim kitabxana işçilərinə böyük rəğbətim var. Onlar cüzi məvaciblə ömürlərini kitab işinə həsr ediblər, şəraitsiz mühitdə çalışıblar və bu baxımdan xarakter və nəciblik etibarı ilə bir-birilərinə bənzəyirlər. Kitabxana işindən xəbərsiz olan Adil Kərimov onları anlaya bilməz. İndiki dövrdə formal attestasiya adı ilə onları işsiz qoymaq adil əməl deyil”.
Ekspertin sözlərinə görə, ölkədə minlərlə kitabxananın bağlanması onsuz da işsizlik yaradır və qalan kitabxanaçılara toxunulmamalıdır:
“Ölkədə minlərlə kitabxana bağlanırsa, elə bunun özü işsizlik ordusu yaratmaqdır. Qalan kitabxanalarda çalışan kitabxanaçılara isə toxunmaq lazım deyil. Onların ən az təcrübəlisi kitabı sən nazirdən yaxşı bilir”.
E.Əliyev nazirliyə insanları işsiz qoymaq əvəzinə yeni nəsil kitabxanalar açmağı, mövcud kitabxanaları yeni ədəbiyyatla təmin etməyi, bərbad durumda olan yerlərdə şəraiti yaxşılaşdırmağı və yalnız kitabxanaçıları ixtisas kurslarına cəlb etdikdən sonra bu prosesə başlamağı təklif edib.
Qiymət Mahir
