Husilər Səudiyyə gəmisini vurdu - ekipaj üzvləri həlak oldu

Yəməndəki husilərin Bab əl-Məndəb boğazında Səudiyyə Ərəbistanına məxsus ticarət gəmisinə raket zərbəsi endirdiyi bildirilir.

TodayPress TV xarici KİV-ə istinadən xəbər verir ki, İranın "ISNA" xəbər agentliyi və ərəb mediasının yaydığı məlumata görə, hücum nəticəsində ən azı 3 ekipaj üzvü həlak olub.

İlkin məlumatlara görə, zərbə Yəmənin Taiz şəhərinin şərqindən həyata keçirilib.

Həlak olanlardan 2-nin Pakistan, 1-nin isə İndoneziya vətəndaşı olduğu bildirilir.

Qeyd edək ki, husilər iyulun 20-də Səudiyyə Ərəbistanı ilə əlaqəli gəmilərə qarşı dəniz blokadası elan edib və onların Qırmızı dənizin cənub girişində yerləşən Bab əl-Məndəb boğazından keçməsinə qadağa qoyub.

Bundan sonra boğazdan keçən Səudiyyə gəmilərinə qarşı bir neçə hücumun həyata keçirildiyi bildirilir.

Hücumla bağlı əlavə təfərrüatlar  hələlik məlum deyil.

Jalə Rövşən