Yaponiya smartfon istifadəsinə məhdudiyyət təklif edir

Yaponiyanın Ayiçi prefekturasına aid Toyaoke şəhəri sakinlərə gündə cəmi iki saat smartfondan istifadəni tövsiyə edən yeni qayda layihəsi irəli sürüb. 

TodayPress TV xəbər verir ki, bu barədə “The Guardian” yazır.

Layihə oktyabrda müzakirəyə çıxarılacaq. Qanun ölkədə ilk dəfə bütün vətəndaşlara — yaşından asılı olmayaraq — şamil ediləcək. Lakin tədbir könüllü xarakter daşıyacaq və qaydanı pozanlara qarşı heç bir sanksiya nəzərdə tutulmayacaq.

Şəhər meri Masafumi Koki vurğulayıb ki, təşəbbüs qadağa məqsədi daşımır, əsas məqsəd ailə daxilində cihazlardan istifadənin vərdişləri barədə söhbətə təkan verməkdir. Onun sözlərinə görə, həddindən artıq ekran vaxtı yuxuya, psixi və fiziki sağlamlığa mənfi təsir göstərir, məktəblilər arasında isə dərsdən yayınmaya səbəb ola bilər. Layihəyə görə, ibtidai sinif şagirdləri üçün smartfon istifadəsi 21:00-dan, yeniyetmə və böyüklər üçün isə 22:00-dan sonra yolverilməzdir.

Buna baxmayaraq, şəhər rəhbəri cihazların gündəlik həyatda vacibliyini etiraf edib, amma qanunun insanları vaxtdan düzgün istifadəyə yönəldə biləcəyinə ümid etdiyini bildirib.

Şəhər sakinlərinin reaksiyası əsasən mənfi olub: dörd gün ərzində daxil olan 83 zəng və 44 məktubun təxminən 80%-ində təşəbbüs səmərəsiz və şəxsi azadlıqlara zidd hesab olunub. Sosial şəbəkələrdə isə iki saatlıq limiti “real olmayan” adlandıraraq, bu müddətin sadəcə bir kitab oxumaq və ya film izləmək üçün belə kifayət etmədiyini yazıblar.

Qiymət Mahir