Kofe qaraciyəri piylənmədən qoruya bilər

Müntəzəm və ölçülü şəkildə kofe içmək qaraciyərin piylənməsinə qarşı qoruyucu təsir göstərə bilər.

TodayPress TV xəbər verir ki, bu barədə dietoloqlar məlumat verib.

Araşdırmalara görə, qaraciyər orqanizmin həyat üçün vacib funksiyalarını yerinə yetirir: qanı təmizləyir, qidaları parçalayır, toksinləri zərərsizləşdirir və maddələr mübadiləsini tənzimləyir. Bu orqanın sağlamlığı sirroz, hepatit və alkoqolsuz yağlı qaraciyər xəstəliyi (NAFLD) kimi xroniki problemlərin qarşısını almaq üçün olduqca vacibdir.

Tədqiqatlar göstərir ki, gündəlik qidalanmaya kofe daxil edən insanlarda qaraciyərin yağlanması və fibroz riski əhəmiyyətli dərəcədə azalır. Fibroz qaraciyərdə çapıq toxumalarının əmələ gəlməsidir və sirroza çevrilə bilər. Həmçinin, kofe bəzi hallarda qaraciyər xərçəngi — xüsusilə hepatosellulyar karsinoma riskini də azalda bilər.

Maraqlıdır ki, kofenin müsbət təsirləri onun növündən asılı deyil — hətta kofeinsiz, dənəvər və ya üyüdülmüş formada da bu faydalar müşahidə olunur. Bu, içkidəki polifenollar və antioksidantlarla əlaqələndirilir.

Lakin mütəxəssislər xəbərdarlıq edirlər: kofedən fayda görmək üçün onu normada qəbul etmək lazımdır. Gündəlik təhlükəsiz doza 400 milliqram kofein sayılır — bu isə təxminən 2–3 fincan kofeyə bərabərdir. Həddən artıq içildikdə yuxusuzluq, narahatlıq və ürək döyüntüsündə artım kimi yan təsirlər ola bilər. Yüksək təzyiq və həzm sistemi problemi olan şəxslər isə kofeni müalicə məqsədilə istifadə etməzdən əvvəl həkimlə məsləhətləşməlidirlər.

Qiymət Mahir