Venger FIFA qalmaqalı ilə bağlı susqunluğunu pozdu!
Arsen Venger DÇ hüquqlarının satışı ilə bağlı FIFA layihəsinə münasibət bildirib.
TodayPress TV “Sky Sports” nəşrinə istinadən xəbər verir ki, FIFA-nın qlobal futbolun inkişafı üzrə direktoru dünya çempionatının kommersiya hüquqlarının satışı ilə bağlı nəzərdə tutulan FIFA Forward Enterprise (FFE) layihəsinin hazırlanmasında iştirak etmədiyini açıqlayıb və layihənin ləğv olunmasını dəstəklədiyini bildirib.
Xatırladaq ki, təşəbbüs dünya çempionatının hüquqlarının satışı üçün yeni strukturun yaradılmasını nəzərdə tuturdu. Lakin futbol konfederasiyalarının sərt tənqidləri və UEFA-ya üzv ölkələrin turniri boykot edə biləcəyi ilə bağlı xəbərdarlıqlardan sonra FIFA prezidenti Canni İnfantino layihənin həyata keçirilməsindən imtina edib.
“FIFA-da baş verən son hadisələrlə əlaqədar bəzi məqamlara aydınlıq gətirmək istəyirəm. Mən qurumda qlobal futbolun inkişafı şöbəsinə rəhbərlik edirəm.
Komandamla birlikdə oyun məlumatlarının təhlili, FIFA-nın onlayn məşq mərkəzinin fəaliyyəti, ehtiyac duyulan 60 ölkədə fəaliyyət göstərən 60 akademiya vasitəsilə gənclərin inkişafı və dünya üzrə gənclər yarışlarına nəzarət edirəm.
Bundan əlavə, Beynəlxalq Futbol Assosiasiyaları Şurasının (IFAB) texniki müşaviri kimi fəaliyyət göstərirəm. Bu strateji planın hazırlanmasında iştirak etməmişəm və layihə barədə ilk dəfə KİV-dən məlumat almışam.
Layihənin dayandırılması tamamilə zəruri və mübahisəsiz qərar idi. Çünki mən futbola sadiqlik, şəffaflıq və dürüstlüklə xidmət edən müstəqil FIFA-nın mövcudluğuna qəti şəkildə inanıram", – deyə Venger bildirib.
Namiq HUN
