İnfantinonun dördüncü müddəti sual altında: FIFA-ya rəsmi müraciət

İnsan hüquqlarının müdafiəsi məsələləri ilə məşğul olan qeyri-kommersiya təşkilatı “FairSquare” Canni İnfantinonun FIFA prezident seçkilərində dördüncü dəfə namizədliyini irəli sürməsinə qarşı çıxıb.

TodayPress TV “The Athletic”ə istinadən xəbər verir ki, təşkilat FIFA-nın İdarəetmə, Audit və Uyğunluq Komitəsinə göndərdiyi məktubda İnfantinonun dördüncü müddətə namizədliyinin qurumun nizamnaməsinə zidd olduğunu bildirib.

FIFA qaydalarına əsasən, prezident maksimum üç müddət vəzifədə qala bilər. Lakin 2022-ci ildə müvafiq komitə İnfantinonun 2016-2019-cu illərdəki ilk müddətinin hesaba alınmamasına qərar verib. Buna səbəb onun həmin dövrdə istefa verən Yozef Blatterin yarımçıq qalmış müddətini başa çatdırması göstərilib.

“FairSquare” isə bu qərarı qanunsuz hesab edir. Təşkilatın mövqeyinə görə, FIFA nizamnaməsində prezidentin müddətinin nə qədər davam etməsindən və hansı Konqresdə seçilməsindən asılı olmayaraq hər hansı istisna nəzərdə tutulmayıb.

Məsələyə Norveç Futbol Federasiyası da qoşularaq şikayəti dəstəkləyib. FIFA rəhbərliyi ətrafında yaranan digər mübahisələr fonunda İnfantinonun yenidən seçilməsi məsələsinin də çətinləşdiyi bildirilir. Onun siyasətinə UEFA, KONKAKAF və Asiya Futbol Konfederasiyasının da qarşı çıxdığı qeyd olunur.

Namiq HUN

TodayPress TV