Paşinyanın ən yaxın silahdaşı belə “vuruldu” – Simonyanla bağlı şok iddialar
“İyulun 3-də Ermənistan parlamentinin sədri vəzifəsini hələ də icra edən Alen Simonyan jurnalistlərə açıqlamasında bildirib ki, növbəti parlamentdə təmsil olunmayacaq, deputat mandatından imtina edərək bir müddət istirahətə çəkiləcək. Halbuki, cəmi bir həftə əvvəl o, parlament sədrliyinə namizəd göstərilmişdi”.
TodayPress TV "Globalinfo.az"a istinadən xəbər verir ki, bu barədə erməni KİV-ləri məlumat yayıb.
“Baş nazirlə müzakirə etmişəm. Mandatı qəbul etməyəcəyəm, Milli Məclisə gəlməyəcəyəm. Partiya var, idarə heyəti var və mən onların qərarına tabeyəm. Baş nazirlə gələcək addımları müzakirə etməmişəm, amma özümü Nikol Paşinyan olmadan siyasətdə təsəvvür etmirəm. Öz xahişimlə bir müddət dincəlmək qərarına gəldim”, – deyə Simonyan bildirib.
Komanda yoldaşlarından narazı olduğu hiss olunsa da, o əlavə edib:
“Əgər baş nazir desə ki, bir il heç nə etmə, böyük ehtimalla elə də edəcəyəm. Oyunun qaydaları belədir”.
Xatırladaq ki, son günlər Alen Simonyanın yaxın çevrəsi onun Ermənistan Prezidenti, İrəvan meri və ya nazir təyin olunacağı barədə müxtəlif versiyalar yayırdı. Lakin bu iddialar özünü doğrultmayıb. Nikol Paşinyan isə məsələ ilə bağlı açıq şəkildə bildirib ki, Simonyanın gələcək taleyi sonradan müzakirə olunacaq.
Paşinyan daha əvvəl jurnalistlərin “Alen Simonyan parlamentdə deputat kimi fəaliyyətini davam etdirəcəkmi?” sualına cavabında demişdi:
“Müzakirə edəcəyik. O da qərar verəcək, komanda da. Fikirlərimizi uyğunlaşdıracağıq. Hesab edirəm ki, komandamızda yalnız vəzifədə olanlar deyil, keçmiş vəzifə sahibləri də olmalıdır. Bu, siyasi təcrübə və siyasi kapitaldır”.
Bununla Paşinyan Simonyanın gələcəkdə partiyada daha çox “siyasi kapital” kimi qalacağını vurğulamışdı.
Bəs niyə hakim “Vətəndaş Müqaviləsi” Partiyası Alen Simonyana qarşı belə sərt davrandı?
“Joxovurd” qəzetinin hakim partiyadakı mənbələrinin sözlərinə görə, səbəb kifayət qədər sadədir:
“Simonyan parlament sədri olduğu müddətdə partiya daxilində demək olar ki, heç kim ona açıq şəkildə etiraz etməyə cəsarət etmirdi. Yeganə istisna Hayk Sarkisyan olub. Mənbələr iddia edirlər ki, digər partiya üzvləri sadəcə münasib məqamı gözləyirdilər.
Bildirilir ki, illər ərzində deputatlar və aparat əməkdaşları Simonyanın komandasından müxtəlif səbəblərlə narazı qalıblar və bu narazılıqlar zamanla yığılıb. İddialara görə, bəzi deputatlar beş il ərzində bir dəfə də ezamiyyətə göndərilmədiyi halda, Simonyanın keçmiş köməkçisi Hasmik Hakobyan bütün səfərlərdə onu müşayiət edib. Bir çox hakim partiya deputatının Alen Simonyanın qəbuluna çıxmasına yaxın çevrəsi mane olub. Partiya daxilində bu hadisələrin hamısı yadda saxlanılıb və münasib vaxtda nəticəsi ortaya çıxıb”.
Qəzet yazır ki, bütün bu məlumatlar Nikol Paşinyana çatdırılıb və nəticələr çıxarılıb:
“Simonyanın vətəndaşa tüpürməsi ilə bağlı qalmaqal, anasının davranışı, qardaşı və gəlininin adı hallanan korrupsiya iddiaları da Paşinyanın diqqətindən yayınmayıb. Nəticədə, hazırda Alen Simonyan artıq parlamentdə əməkdaşlarla vidalaşmağa başlayıb”.
