Paşinyan: “Dostluq şəraitində həll istəyirik”

Ermənistanın dəmir yollarının Rusiya tərəfindən idarə olunması ilə bağlı məsələnin kəskin qarşıdurma yolu ilə deyil, dostluq şəraitində həll edilməsinin tərəfdarıyam.

TodayPress TV xəbər verir ki, bunu Ermənistan Baş naziri Nikol Paşinyan brifinqdə jurnalistlərə deyib.

“Dəmir yolu ilə bağlı vəziyyətə gəlincə, biz dostluq şəraitində həll istəyirik. Yəni hansısa kəskin qərarlara getmək istəmirik. Dostluq şəraitində həll nə ola bilər? Bu, bir-birimizin maraqlarını qarşılıqlı şəkildə anlayıb dərk etməyimiz və müəyyən kompromislərə getməyimiz deməkdir”, - o bildirib.

Baş nazir mümkün kompromislərdən biri kimi “Rusiya Dəmir Yolları”nın Ermənistandakı konsessiya hüququnun satılmasını göstərib. Onun sözlərinə görə, bu satış tam və ya qismən həyata keçirilə, həmçinin elə səhmdarlıq modeli seçilə bilər ki, Ermənistanın beynəlxalq nəqliyyat şəbəkəsinə inteqrasiyası üçün imkan yaransın.

Paşinyan 2 milyard dollar məsələsinə də aydınlıq gətirib. O qeyd edib ki, bu rəqəmi konkret tələb və ya konkret ödənişlə əlaqələndirməyib və yalnız mümkün inkişaf ssenarilərindən birini nəzərdə tutub: “2 milyardla bağlı məsələyə gəlincə, mən bunun konkret olaraq hər hansı bir məsələyə aid olduğunu deməmişəm. Mən bunu mümkün inkişaf ssenarilərindən biri kimi, konkretlik göstərmədən və bunun nəzəri və praktiki olaraq həyata keçirilə biləcəyi bütün mümkün istiqamətləri nəzərə alaraq söyləmişəm”.

Qeyd edək ki, Paşinyan daha əvvəl də Ermənistanın dəmir yollarının Rusiya konsessiyasından çıxarılması və ya konsessiya hüququnun başqa, həm Moskva, həm də İrəvan üçün dost ölkəyə verilməsi variantını gündəmə gətirib.