ABŞ və Yaponiya Çinə qarşı nəhəng layihəyə hazırlaşır: Dünyanın ən dərin mədəni tikiləcək
ABŞ və Yaponiya Sakit okeanda nadir torpaq minerallarının çıxarılması üçün dünyanın ən dərin mədənlərindən birini inşa etməyi planlaşdırır.
TodayPress TV xəbər verir ki, "Bloomberg"in məlumatına görə, mədən Tokiodan təxminən 2 min kilometr cənub-şərqdə yerləşən Minamitori adası yaxınlığında açıla bilər.
Layihənin təxminən 6 kilometr dərinlikdə həyata keçirilməsi nəzərdə tutulur. Ərazidə nadir torpaq elementlərinin böyük yataqlarının olduğu bildirilir. Bu minerallar elektronika, elektromobillər və yüksək texnologiyalı məhsulların istehsalında istifadə olunur.
Mütəxəssislər hesab edirlər ki, layihə ABŞ və Yaponiyaya mədəndən hazır maqnitlərə qədər öz nadir torpaq təchizat zəncirini yaratmağa imkan verə bilər. Bu isə ölkələrin Çindən asılılığını azaltmağa kömək edə bilər.
İndiyədək ərazidəki tədqiqatları əsasən Yaponiya aparıb. Hazırda isə "Deep Reach Technology" də daxil olmaqla bir sıra ABŞ şirkətləri layihəyə maraq göstərir.
Layihənin reallaşması Sakit okeanda nadir torpaq resursları uğrunda rəqabəti daha da gücləndirə bilər.
Türkan İsgəndərli
