Nizami Gəncəvini təhqir etdilər - Azərbaycanla Gürcüstan arasında nələr baş verir?
Azərbaycan şairi Nizami Gəncəvinin Gürcüstandakı abidəsi pis vəziyyətə salınıb.
TodayPress TV xəbər verir ki, bu barədə azərbaycanlı siyasətçi Aqil Səmədbəyli görüntülər yayıb.
O,Gürcüstanın Marneuli rayonunda yerləşən dahi Azərbaycan şairi Nizami Gəncəvinin büstü ilə bağlı narahatlığını ifadə edib.
Görüntülərdə görünür ki, büstün gözləri qırmızı rəngə boyanıb:
"Gürcüstanın Marneuli rayonunda, Nəriman Nərimanov küçəsi ilə Nizami Gəncəvi küçəsinin kəsişməsində dahi şairimiz Nizami Gəncəvinin büstünə qarşı sayğısızlıq edilib. Ümid edirəm ki, bizim ilgili şəxslər gərəkli tədbir görəcəklər".
Siyasətçi daha sonra məsələ ilə bağlı vəziyyətin dəyişdiyini açıqlayıb. Onun sözlərinə görə, əvvəlki paylaşımından sonra büstün ətrafında müəyyən işlər görülüb. Belə ki, onun üstünə örtük örtülüb.
Qeyd edək ki, Marneulidə yerləşən Nizami Gəncəvi büstü bölgədəki Azərbaycan mədəni irsinin rəmzlərindən biri hesab olunur və onun vəziyyəti ictimaiyyət tərəfindən həssaslıqla izlənilir.
Azərbaycanın Gürcüstandakı Səfirliyinin məlumatına görə, hadisəni törədən şəxs etnik azərbaycanlıdır və psixi problemləri, həmçinin alkoqol asılılığı ilə tanınır.
Yəni insidentin planlaşdırılmış siyasi və ya etnik təxribat xarakteri daşıdığına dair əlamətlər yoxdur.
Hazırda Gürcüstan Polisi tərəfindən araşdırma aparılır və hadisənin bütün təfərrüatları dəqiqləşdirilir.
Bu cür xoşagəlməz hadisələr təəssüf doğursa da, onlar Azərbaycan və Gürcüstan arasında mövcud olan dostluq və strateji tərəfdaşlıq münasibətlərini əks etdirmir.
Xatırladaq ki, oxşar fərdi hadisələr keçmiş illərdə də qeydə alınıb. Belə ki, naməlum şəxslər abidənin alt hissəsinə təhqiramiz ifadələr yazıblar. Bu səbəbdən vandalizm aktına etiraz olaraq aksiya keçirilib. Nümayişə Gürcüstanın müxtəlif bölgələrindən olan ziyalılar və ictimaiyyət nümayəndələri də qoşulublar.
Bütün bunlara baxmayaraq, Azərbaycanla Gürcüstan arasında ümumilikdə normal və strateji əməkdaşlıq münasibətləri davam edir. İki ölkə qonşu və strateji tərəfdaşdır. Hətta mayın 26-dan etibarən ölkərarası sərnişin qatarı fəaliyyətə başlayıb.
Türkan İsgəndərli
