İşğalın mirası: Beynəlxalq hüquq NİYƏ SUSDU?
“Ermənistanın işğal siyasəti Azərbaycan torpaqlarında sistemli talan və insanlığa qarşı cinayətlərlə müşayiət olunub”.
Ədalət, Hüquq, Demokratiya Partiyasının (ƏHD) ictimai-siyasi əlaqələr üzrə katibi, politoloq Azər Qasımov bunu TodayPress TV-yə açıqlamasında deyib.
O bildirib ki, Ermənistanın dövlət kimi formalaşması prosesi Azərbaycan əraziləri və dinc əhali üzərində dərin, sağalmaz izlər buraxıb:
“Erməni vandalizmi təkcə insanlara qarşı deyil, şəhər və kəndlərə qarşı da yönəlib. Ağdam şəhəri bu işğalın ən bariz simvoluna çevrilərək faktiki olaraq yer üzündən silinmiş tarixi reallığı təcəssüm etdirir. Bütün bunlar Ermənistan dövlətinin Azərbaycana qarşı məqsədli və açıq düşmənçilik siyasətinin nəticəsi idi”.
Politoloqun sözlərinə görə, işğal olunmuş ərazilərdə sistemli talan siyasəti aparılıb:
“Azərbaycan xalqının tarixi-mədəni irsi planlı şəkildə məhv edilib, müqəddəs məkanlar və məscidlər təhqir olunub. Tikililər sökülüb, maddi və mədəni dəyər daşıyan əşyalar Ermənistana və digər ölkələrə daşınıb. Bu, erməni dövlətinə xas olan faşist mahiyyətin açıq təzahürü idi”.
Azər Qasımov qeyd edib ki, Ermənistan yalnız mədəni irsi deyil, təbii sərvətləri də hədəfə alıb:
“Meşələr, qızıl və digər faydalı qazıntı yataqları, mineral ehtiyatlar illərlə talan edilib. Gələcəkdə bu torpaqlarda həyatın bərpasına imkan verməmək üçün ərazilər kütləvi şəkildə minalanıb, hətta nüvə tullantılarının basdırılması kimi ağır cinayətlərə yol verilib. Bu minalar yüzlərlə insanın həyatına son qoyub və ya onları ömürlük əlil edib”.
Ekspert vurğulayıb ki, Ermənistanın bu siyasətinin arxasında Qərb və Avropa dairələrinin dəstəyi dayanıb:
“Demokratiya və insan haqları adı ilə dünyaya dərs keçən ölkələr uzun illər Ermənistanın işğal siyasətinə göz yumub. Azərbaycan torpaqlarında Qərb şirkətlərinin fəaliyyəti və milli sərvətlərin talanında iştirakı bu gün Ukraynanın təbii ehtiyatları ətrafında baş verən proseslər fonunda daha aydın görünür”.
Sonda Azər Qasımov bildirib ki, bu maraqların əsasında heç vaxt hüquq və ədalət dayanmayıb:
“Onlar üçün əsas meyar yalnız mənfəət olub. Azərbaycan əsgəri ərazilərə daxil olan kimi həmin şirkətlər dərhal geri çəkildi. Ermənistanı da, erməni cəmiyyətinin ümidlərini də yarı yolda qoydular. Bu əməllərə indiyədək ciddi hüquqi qiymət verilməməsi beynəlxalq hüququn çox vaxt kağız üzərində qalan anlayış olduğunu bir daha sübut edir”.
Qiymət Mahir
