Ermənistanın daxili auditoriyaya MESAJI: “2025-ci ilin sentyabrında…”
Ermənistan parlamentinin vitse-spikeri Ruben Rubinyan Azərbaycanla sülh müqaviləsinin 2025-ci ilin sentyabrında imzalanacağına ümid etdiyini bildirib.
TodayPress TV xəbər verir ki, o, bunu Ermənistanın İctimai Televiziyasına müsahibəsində açıqlayıb.
“Ümid edirəm ki, Ermənistan və Azərbaycan sülh müqaviləsini 2026-cı ilin birinci yarısında deyil, 2025-ci ilin sonunda və ya sentyabr ayında imzalayacaq”, - Rubinyan deyib.
Bundan əvvəl isə Türkiyənin xarici işlər naziri Hakan Fidan Ermənistanla Azərbaycan arasında sazişin 2026-cı ilin birinci yarısında imzalanmasının gözlənildiyini bildirib. O, bu addımdan sonra Ankaranın İrəvanla münasibətləri tez bir zamanda normallaşdıracağını vurğulayıb.
Bəs Bakının əsas şərti ilin sonuna qədər təmin edilə bilərmi?
Məsələ ilə bağlı TodayPress TV-yə danışan politoloq Tural İsmayılov bildirib ki, Rubinyanın səsləndirdiyi “sentyabr 2025” tarixli sülh müqaviləsi proqnozu, əslində, İrəvanın daxili auditoriyaya hesablanmış siyasi mesajıdır:
“Ermənistan tərəfi müxtəlif tarixlər səsləndirərək beynəlxalq ictimaiyyətdə Azərbaycanı guya “müqaviləni uzadan tərəf” kimi göstərməyə çalışır. Halbuki reallıqda Bakı dəfələrlə bəyan edib ki, sülhün açarı hazırdır, lakin bunun üçün Ermənistanın öz konstitusion maneələrini aradan qaldırması şərtdir. Ermənistan Konstitusiyasında hələ də Azərbaycana qarşı ərazi iddiaları yer alır və bu, hüquqi baxımdan müqavilə imzalanmasına imkan vermir. Ermənistan ya bunu dəyişməli, ya da manipulyativ tarix oyunlarından əl çəkməlidir”.
Ekspertin qənaətincə, Rubinyanın “sentyabr 2025” arzusu ilə Hakan Fidanın “2026-cı ilin birinci yarısı” təxminləri arasında fərq, əslində, İrəvanın qeyri-müəyyən və qeyri-ciddi siyasətini ortaya qoyur. Bakı üçün əsas olan tarix deyil, şərtlərin yerinə yetirilməsidir. Azərbaycan konkretlik tələb edir: ərazi iddialarının rəsmən ləğvi, revanşist ritorikanın dayandırılması və sərhədin tanınması. Ermənistan isə hələ də vaxt udmaq, daxili siyasətdə populizm qazanmaq və xarici havadarlarına “müqavilə üçün çalışırıq” görüntüsü vermək niyyətindədir. Bu isə real sülh prosesini uzadır.
T.İsmayılov, həmçinin əlavə edib ki, Ermənistanın öz konstitusiyasına toxunmadan sülh imzalaması yalnız kağız üzərində saziş ola bilər:
“Bu saziş isə bir müddət sonra yenidən pozulacaq, çünki hüquqi ziddiyyət qalacaq. Azərbaycan üçün belə formal sənəd qəbuledilməzdir. Ona görə də Bakı prinsipialdır: Ermənistan manipulyasiya etməməli, hüquqi əsasları tam dəyişməlidir. Əks halda, 2025, 2026 və ya başqa bir tarix simvolik rəqəmlər olaraq qalacaq. Ermənistanın səmimiyyəti imzalanacaq müqavilənin tarixi ilə deyil, konstitusion islahatlarla ölçüləcək. Azərbaycan tərəfi güclü və ardıcıl siyasəti ilə artıq göstərib ki, heç bir boş vədlərə aldanmayacaq. Sülhün real yolu manipulyasiya deyil, dürüst və açıq addımlardan keçir”.
Qiymət Mahir
