İraqlı nazir Ərdoğanla görüşdə imza böhranı yaratmışdı - Arxasından İran kəşfiyyatı çıxdı

Türkiyə ilə İraq arasında "İnkişaf Yolu" (Development Road) layihəsi üzrə əməkdaşlıq sazişinin Ankarada keçirilən imzalanma mərasimində yaşanan hadisə xeyli diqqət çəkib.

TodayPress TV xəbər verir ki, Türkiyə Prezidenti Rəcəb Tayyib Ərdoğan ilə İraqın Baş naziri Əli Zeydinin görüşündən sonra təşkil olunan mərasimdə İraq hökumətinin üzvlərindən biri sənədə imza atmaqdan çəkinib.

Hadisə qısa müddətdə ictimai və siyasi müzakirələrə səbəb olub.

Söhbət İraqın nəqliyyat naziri Rəzzak Muheybis əs-Sədavidən gedir.

Bildirilir ki, nazir ilkin mərhələdə sənədi imzalamaq istəməyib. Daha sonra isə Baş nazir Əli Zeydinin göstərişindən sonra sazişi imzalayıb.

Nazirin bu mövqeyi İraqdakı daxili siyasi qüvvələr arasındakı rəqabət və xüsusilə İranın ölkə siyasətindəki təsiri fonunda dəyərləndirilir. Hadisə təkcə diplomatik prosedur deyil, həm də İraq daxilində Türkiyə ilə əməkdaşlığa münasibətdə mövcud siyasi ayrılıqların göstəricisidir.

Bir çox müşahidəçilər nazirin davranışının arxasında İrana yaxın siyasi qrupların təsirinin olub-olmadığını müzakirə edir. Bununla belə, bu iddiaları təsdiqləyən rəsmi açıqlama və ya sübut təqdim edilməyib.

Hadisənin ən diqqətçəkən tərəfi İraq Baş nazirinin sərgilədiyi mövqedir. 5–6 il əvvəl İranın İraq siyasətində təsirinin daha güclü olduğu dövrdə hökumət başçısının İran yönümlü siyasi düşərgəyə yaxın bir nazirə açıq şəkildə göstəriş verərək sənədi imzalatması demək olar ki, mümkün görünməzdi.

Ekspertlərin qənaətincə, İraqda siyasi balans tədricən dəyişir  və mərkəzi hökumətin qərarvermə imkanları əvvəlki dövrlə müqayisədə güclənib. 

Qeyd edilir ki, bununla yanaşı, İranın ölkə siyasətində təsirinin tam aradan qalxdığını söyləmək üçün kifayət qədər əsas da yoxdur.

Jalə Rövşən