“Periodista Digital” yazır, Ermənistan inkar edir - “Tramp Körpüsü” ilə bağlı məlumatlar necə sızıb? – AÇIQLANDI

“Tramp Körpüsü” ilə bağlı yayılan iddialar Fransadakı erməni diasporu tərəfindən Qərb mətbuatına ötürülüb”.

Politoloq Elçin Xalidbəyli bunu TodayPress TV-yə danışarkən bildirib. 

Onun sözlərinə görə, hazırda Ermənistanın Nazirlər Kabinetinin bu versiyaları inkar etməsi isə bu planın bir parçasıdır. Bununla da Ermənistan xarici siyasətdə şəffaflıqdan uzaq, ziddiyyətli və qeyri-müstəqil davranışını bir daha nümayiş etdirib.

“Rəsmi İrəvan indi bu iddiaları təkzib etsə də, mövzu ilk dəfə deyil ki, gündəmə gəlir. Bir müddət əvvəl də Zəngəzur dəhlizinin 100 illik icarəyə verilməsi ilə bağlı yayılan məlumatlar Ermənistan tərəfindən dərhal inkar edilsə də, sonradan ABŞ-nin Türkiyədəki səfiri belə bir təklifin həqiqətən irəli sürüldüyünü təsdiqləmişdi. Bu isə İrəvanın təkziblərinin etibarsızlığı və qeyri-səmimiliyini ortaya qoyur”.

Analitik diqqətə çatdırıb ki, Azərbaycanın bu məsələdə mövqeyi isə aydın və birmənalıdır. Prezident İlham Əliyev dəfələrlə bəyan edib ki, Azərbaycan ərazisində hər hansı xarici operatorun fəaliyyəti mümkünsüzdür. Bu, o deməkdir ki sözügedən “Tramp Körpüsü” layihəsi barədə hər hansı üçtərəfli memorandumdan danışılırsa, bu Azərbaycanın iştirakı olmadan baş verə bilməz.

Politoloqun qənaətincə, buna baxmayaraq, ABŞ-Ermənistan arasında müəyyən danışıqların getməsi ehtimalı realdır. Ermənistanın Baş naziri Nikol Paşinyanın ABŞ-yə aid şirkətin Zəngəzur dəhlizində qarantor kimi çıxış etməsini istisna etməməsi, bu ehtimalları daha da gücləndirir.    

“Paşinyan hökuməti cəmiyyətə real vəziyyəti çatdırmır, Rusiyanın qəzəbinə tuş gəlməkdən ehtiyat edir. Çünki Ermənistan bu gün bir çox vacib sahələrdə Moskvadan asılı vəziyyətdədir və mümkün iqtisadi və siyasi təzyiqlərin qarşısını almaq üçün bəzi geosiyasi niyyətlərini gizlətmək məcburiyyətindədir. Bütün bu məqamları nəzərə alsaq, rəsmi İrəvanın indiki təkzibi də böyük ehtimalla reallıqdan uzaqdır”.  

E.Xalidbəyli “Tramp Körpüsü” məsələsinin nə qədər real olduğunu Paşinyanın Rusiya səfərindən sonra daha aydınlaşacağını bildirib.  

“Ermənistan hələlik müstəqil, prinsipial və qətiyyətli siyasət yürütmək imkanlarından məhrumdur. Ona görə də çalışır ki, zaman qazansın, məsuliyyəti yayındırsın və daxili auditoriyanı çaşdırsın”, - deyə o fikrini yekunlaşdırıb. 

Qeyd edək ki, iyulun 23-də İspan mediası Azərbaycan, Ermənistan və ABŞ arasında Zəngəzur dəhlizinin yaradılmasına dair memorandumun razılaşdırıldığını yazıb. Sənəddə layihəyə “Tramp körpüsü” adı verildiyi də bildirilib. Lakin Ermənistan Nazirlər Kabineti dərhal bu məsələnin həqiqəti əks etdirmədiyini açıqlayıb. Müvafiq məqalələrin reallıqla heç bir əlaqəsinin olmadığı vurğulanıb.   

Töhfə Səməd