Ağdamda Mərkəzi parkın tikintisi davam etdirilir

İşğaldan azad edilmiş Ağdam şəhərində yeni ictimai və istirahət məkanlarının yaradılması istiqamətində layihələr həyata keçirilir.

TodayPress TV xəbər verir ki,  şəhərdə inşa olunan Mərkəzi park da bu layihələrdən biridir.

Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsinin müdiri Təranə Quliyeva bildirib ki, park müasir şəhərsalma prinsipləri əsasında salınır.

Mərkəzi parkın təməli 2023-cü il dekabrın 24-də Prezident İlham Əliyevin iştirakı ilə qoyulub.

Ümumi sahəsi 5,5 hektar olan parkın 3,73 hektarında yaşıllıq zolaqlarının salınması nəzərdə tutulub. Ərazidə istirahət və ictimai tədbirlər üçün meydanlar, 7349 kvadratmetr açıq məkan və 5652 metr uzunluğunda daxili yollar yaradılır.

Parkın ərazisində çay evi, inzibati və iaşə binaları, mobil köşklər, mühafizə və sanitar qovşaqlar, həmçinin su anbarı və nasosxanalar inşa olunur.

Layihədə Ağdamın tarixi-mədəni irsinin yaşadılması da nəzərə alınıb.

Parkda Nizami Gəncəvinin “Xosrov və Şirin” əsərinin qəhrəmanı Fərhadın heykəlinin qoyulması planlaşdırılır.

1959-cu ildə heykəltaraş Tokay Məmmədov tərəfindən hazırlanan və işğal dövründə dağıdılan abidə onun orijinal eskizi əsasında yenidən hazırlanır.

Heykəlin hazırlanması Xalq rəssamı Hüseyn Haqverdiyevə həvalə olunub. Texniki işlərə Sənan Cəfərov rəhbərlik edir. Layihənin baş kuratoru isə Əməkdar rəssam, elmlər doktoru Rəşad Mehdiyevdir.