Məşhur memardan tənqid: "Vandallar Bakını sökür"
Bakının mərkəzində, Şamil Əzizbəyov küçəsi 38 ünvanında yerləşən tarixi binanın sökülməsi memarlıq ictimaiyyətində narazılıq doğurub.
TodayPress TV xəbər verir ki, memar Elçin Əliyev söküntü işlərinin aparılma qaydasını sərt tənqid edib və məsul qurumları tarixi-mədəni irsə hörmətsizlikdə ittiham edib.
Onun sözlərinə görə, sökülən bina memarlıq abidəsi statusuna malik olmasa da, şəhərin tarixi simasının bir hissəsi idi və onunla daha ehtiyatlı davranmaq mümkün idi:
"Eşidirsinizmi, bunlar vandaldılar! Məgər Şamil Əzizbəyov küçəsi 38 ünvanında yerləşən binanı memarlıq tariximizə hörmətlə, iki əsr əvvəl fasad daşının üzərində sevgi ilə çalışan onlarla naməlum ustanın əməyinə ehtiramla sökmək mümkün deyildimi? Cəmiyyətə, hətta şəhərin gələcək inkişafı ilə bağlı mürəkkəb və birmənalı qarşılanmayan qərar qəbul etmiş rəhbərlərə hörmətlə yanaşmaq olmazdımı?".
Memar əlavə edib ki, söküntü prosesi şəhərin mərkəzində tarixi tikilinin dağıdılması deyil, sanki talan edilməsini xatırladıb.
"Heç olmasa özünüzə hörmət edin – axı, ay vicdansızlar, bunun üçün sizə pul ödəyirlər! Sanki ekskavatorla gəlib şəhərin mərkəzindəki tarixi tikilini talan edən, dağıdıb viran qoyan barbarlardır. Və oğurlayacaq heç nə qalmayanda oranı tərk ediblər".
Elçin Əliyev bildirib ki, şəhər rəhbərliyi tərəfindən tarixi binaların sökülməsi barədə qərar qəbul edilibsə, bu proses mədəni və peşəkar qaydada həyata keçirilməlidir:
"Biz bununla razı olsaq da, olmasaq da, qərar qəbul olunub və şəhər məmurlarına bir vəzifə tapşırılıb: memarlıq abidəsi statusuna malik olmayan tarixi binaların sökülməsi. Elə isə bunu insan kimi edin! Axı siz vəhşi deyilsiniz! Bahalı kostyumlar geyinirsiniz, insanların yanında burnunuzu qurdalamırsınız, yaxşı davranış qaydalarına maliksiniz, mədəniyyət, musiqi və memarlıq haqqında mülahizələr yürüdür, dövlət qurumlarını təmsil edirsiniz. Bəs onda niyə fəaliyyətinizin nəticəsi basqından sonrakı mənzərəni xatırladır?".
O, söküntü işlərinin həyata keçirilməsi üçün xüsusi işçi komissiyasının yaradılmasını, ərazinin hasarlanmasını, görülən işlərin məqsədini izah edən məlumat lövhələrinin quraşdırılmasını və yaranan narahatlığa görə ictimaiyyət qarşısında üzr istənilməsini təklif edib.
"İşlərə başlamazdan əvvəl binanın fotoqrafik sənədləşdirilməsini təşkil edin. İlk növbədə memarlıq detallarını gələcək muzey, arxiv və ya elmi fond üçün diqqətlə sökün və qoruyun. Bunlar sadəcə ən aşkar tədbirlərdir. Mədəniyyət Nazirliyinin rəhbərliyinə daha bir sualım var: məgər bina o qədərmi eybəcər idi ki, onu bərpa edərək qorumaq mümkün deyildi? Məgər onun üzərində memarlıq detalları az idi? Yoxsa hər bir binanın dövlət tərəfindən qorunan obyektlər siyahısına daxil edilməsi üçün sizi maraqlandıracaq ayrıca lobbiçisi olmalıdır?".
Ekspert memarlıq irsinə münasibətlə bağlı məşhur aforizmi misal çəkib:
"Düşünmək üçün beyin lazımdır, insan olmaq üçün isə daha çox".
Türkan İsgəndərli
