FIFA-da böhran böyüyür: üç konfederasiyadan araşdırma tələbi
UEFA, Asiya Futbol Konfederasiyası (AFC) və Şimali, Mərkəzi Amerika və Karib hövzəsi Futbol Konfederasiyası (KONKAKAF) FIFA-nın fəaliyyətinin araşdırılması ilə bağlı açıq məktub yayıb.
TodayPress TV xəbər verir ki, buna səbəb FIFA prezidenti Canni İnfantinonun dünya çempionatının kommersiya hüquqlarının bir hissəsinin satılması ilə bağlı təklifi olub.
Üç konfederasiyanın rəhbərləri bildiriblər ki, məsələ maliyyə ilə bağlı deyil. Onların sözlərinə görə, əsas problem futbolun idarə edilməsində şəffaflıq, etimad və hesabatlılıq prinsipləridir.
Açıq məktubda qeyd olunub ki, son onillikdə futbolun inkişafı bir şəxsin deyil, FIFA, konfederasiyalar, üzv assosiasiyalar və minlərlə futbol mütəxəssisinin birgə fəaliyyətinin nəticəsidir.
Konfederasiyalar FIFA-nın dünya çempionatının hüquqlarının bir hissəsinin satılması ilə bağlı təklifini ciddi səhv kimi qiymətləndirib. Onlar hesab edirlər ki, bu məsələ sadəcə kommunikasiya və ya prosedur problemi deyil, FIFA-nın xidmət etməli olduğu futbol qurumlarına olan etimadın fundamental şəkildə pozulmasıdır.
Məktub müəllifləri FIFA-nın məsələ ilə bağlı araşdırmanı öz əməkdaşlarının və ya futbol dünyasında maraqlı tərəflərin iştirakı ilə aparmasını da qəbuledilməz hesab ediblər. Onların fikrincə, araşdırma tamamilə müstəqil üçüncü tərəf tərəfindən həyata keçirilməlidir və FIFA administrasiyası prosesdə iştirak etməməlidir.
UEFA, AFC və KONKAKAF həmçinin FIFA rəhbərliyinin Mərakeşdə keçirilən görüşü ilə bağlı narahatlıqlarını ifadə edib. Bildirilib ki, həmin toplantıda yalnız bir seçilmiş nümayəndə iştirak edib, FIFA Şurasının üzvləri və üzv assosiasiyalar görüşə dəvət olunmayıb.
Məktubda vurğulanıb ki, futbol rəhbərliyi hakimiyyət sahibi olmaq deyil, futbol ailəsinə xidmət etmək və ona göstərilən etimadı doğrultmaq deməkdir.
Sonda üç konfederasiya futbolun gücünün onun birliyində olduğunu bildirərək, rəhbərliyin futbola xidmət etməli, ona hökm etməyə çalışmamalı olduğunu qeyd edib.
Məktubu UEFA prezidenti Aleksander Çeferin, KONKAKAF prezidenti Viktor Montalyani, AFC prezidenti Salman bin İbrahim əl-Xəlifə, həmçinin üç qurumun baş katibləri Teodor Teodoridis, Filip Modjo və Datuk Seri Vindsor Con imzalayıb.
Namiq HUN
