“Dinamo”nun məşqçisi “Qarabağ”ın gücünü etiraf etdi
“Dinamo Kiyev”in baş məşqçisi İqor Kostyuk Ukrayna Premyer Liqasının II turunda “Veres” üzərində 2:1 hesablı qələbədən sonra komandasının hücumdakı problemləri və sıx oyun qrafiki barədə danışıb.
TodayPress TV “Qafqazinfo”ya istinadən xəbər verir ki, ukraynalı mütəxəssis “Dinamo”nun hücumda zəif təsir bağışlaması ilə bağlı fikirlərə münasibət bildirib və “Qarabağ”ın müdafiə baxımından güclü komanda olduğunu vurğulayıb.
“Komandamızın zəif oynadığını deməzdim. Sadəcə, qol imkanlarından istifadə edə bilmirik. Müxtəlif kombinasiyalardan yararlanırıq. Təəssüf ki, yaratdığımız şansları qola çevirə bilmirik.
Bundan əvvəl yaxşı müdafiə olunan rəqiblərlə qarşılaşmışdıq. Həm PAOK, həm də “Qarabağ” çox fəal oynadı. Deməli, hər şey sizin dediyiniz kimi deyil”, – deyə Kostyuk bildirib.
Baş məşqçi həftədə iki oyundan ibarət sıx qrafikin komandaya təsirindən də danışıb. Onun sözlərinə görə, belə bir rejimdə əsas diqqət futbolçuların bərpasına, rəqiblərin və əvvəlki qarşılaşmaların təhlilinə yönəldiləcək.
Kostyuk “Veres”lə matçda geniş rotasiyaya getdiklərini də qeyd edib.
“Böyük rotasiya etdik. “Qarabağ”la oyunda meydana çıxmayan futbolçulara daha çox oyun vaxtı verdik. Onların oyunu yaxşı təsir bağışladı”, – deyə mütəxəssis əlavə edib.
Namiq HUN
