İnsan tərində qrip virusunu basqılayan molekul tapıldı
İnsan orqanizmində qripə qarşı təbii müdafiə mexanizmi kəşf edilib.
TodayPress TV xəbər verir ki, bu barədə "Gazeta.ru"da məqalə dərc olunub.
Beynəlxalq alimlər qrupu antimikrob peptid olan dermcidinin qrip virusunu zəiflətmək və infeksiyanın qarşısını almaq qabiliyyətinə malik olduğunu göstərib. Tədqiqatın nəticələri "Proceedings of the National Academy of Sciences" (PNAS) jurnalında dərc olunub.
Dermcidin uzun müddətdir ki, antibakterial və göbələk əleyhinə xüsusiyyətlərə malik bir maddə kimi tanınır. O, insan bədəni tərəfindən fasiləsiz şəkildə sintez olunur və tərin tərkibində mövcuddur. Lakin yeni tədqiqatlar göstərib ki, bu peptid həm də antiviral aktivliyə malikdir.
Hüceyrə kulturaları və heyvan modelləri üzərində aparılan təcrübələrə əsasən, dermcidin qrip virusunun hüceyrələrə daxil olmasının qarşısını ala bilir. O, virusun səthində yerləşən və hüceyrələrə yapışma və onların daxilinə nüfuz etmə prosesində mühüm rol oynayan hemaglutinin zülalı ilə birləşir.
Bu qarşılıqlı təsir virus zülalının strukturunu dəyişdirir və onun hüceyrə membranı ilə birləşməsinə mane olur. Nəticədə, virus infeksiya baş verməzdən əvvəl təsirsiz hala gətirilir.
Tədqiqatçılar qeyd edirlər ki, “bu mexanizm mövcud antiviral dərmanların çoxunun təsir prinsipindən fərqlənir, çünki həmin dərmanlar əsasən neyraminidaza zülalını hədəf alır. Virus zamanla bu dərmanlara qarşı müqavimət inkişaf etdirə bilər.”
Alimlər həmçinin müəyyən ediblər ki, dermcidin yalnız tərdə deyil, həm də tənəffüs viruslarının bədənə ən çox daxil olduğu bölgələrdə — nazofarenksdə, tüpürcəkdə və göz yaşlarında da mövcuddur.
Bundan əlavə, aparılan təhlillər göstərib ki, qripəbənzər simptomlar yaşamayan insanların orqanizmində dermcidin səviyyəsi daha həssas insanlarla müqayisədə təxminən altı dəfə yüksəkdir. Tənəffüs yollarının xəstəlikləri zamanı isə bu maddənin konsentrasiyası əhəmiyyətli dərəcədə artır.
Tədqiqatçıların fikrincə, bu kəşf yeni antiviral dərmanların hazırlanmasına töhfə verə bilər. Dermcidin virusun ştammlar arasında az dəyişən bölgələrini hədəf aldığı üçün müxtəlif qrip variantlarına qarşı eyni anda qoruyucu təsir göstərə biləcək potensiala malikdir.
Jalə Rövşən
