Türkiyə Osmanlı sərhədlərini bərpa edir, Hörmüz boğazı Ankaraya tapşırılır - İDDİA

ABŞ-də bəzi siyasi və analitik dairələrdə Türkiyə ilə bağlı yeni və kifayət qədər mübahisəli iddialar müzakirə olunur.

TodayPress TV siyasi kulis məlumatlarına istinadən xəbər verir ki, Türkiyə əleyhinə mövqeyi ilə seçilən bəzi çevrələr tərəfindən irəli sürülən bu iddialara görə, guya Ankara gələcəkdə Bəsrə körfəzinə qədər irəliləyərək tarixi Osmanlı imperiyasının vaxtilə nəzarət etdiyi coğrafiyaya yenidən çatacaq.

İddialarda bildirilir ki, ABŞ Türkiyənin İraqın şimalından başlayaraq Mosul–Kərkük–Bəsrə körfəzi–Küveyt–Bəhreyn xəttində təhlükəsizliyi təmin etməsi və burada "təhlükəsiz zona" yaratmasını nəzərdən keçirir. Həmçinin Türkiyənin Qətər və Səudiyyə Ərəbistanı ilə koordinasiyalı şəkildə Omana qədər uzanan ərazidə fəaliyyət göstərərək Hörmüz boğazının quru istiqamətindən təhlükəsizliyinin təmin edilməsində rol ala biləcəyi iddia olunur. 

Həmin iddialarda daha sonra Türkiyə Silahlı Qüvvələrinin mümkün quru əməliyyatlarında İraqın şimalındakı kürd silahlı qruplarının da iştirakının planlaşdırıldığı irəli sürülür.

Məlumata görə, guya ABŞ belə bir Türkiyə–Ərəb koalisiyasını formalaşdırmaq məqsədilə İsrailə Fələstin dövlətinin tanınması və Qəzzada sülh prosesinə dəstək verməsi üçün təzyiq göstərməyi də nəzərdən keçirir.

Qeyd edək ki, sözügedən ssenari hazırda yalnız Türkiyə əleyhinə dairələrin gündəmə gətirdiyi, heç bir rəsmi mənbə tərəfindən təsdiqlənməyən absurd iddia kimi qiymətləndirilir.

Jalə Rövşən