Tokayev: Qazaxıstan BTC ilə neftin nəqlini artıracaq
Qazaxıstan Bakı-Tbilisi-Ceyhan (BTC) neft kəməri ilə neftin nəqli həcmlərini artırmaq niyyətindədir.
TodayPress TV "Akorda"ya istinadən xəbər verir ki, bu barədə Qazaxıstan Prezidenti Kasım-Jomart Tokayev Gürcüstanın Baş naziri İrakli Kobaxidze ilə danışıqların yekunlarına əsasən bildirib.
"Dövlətlərimiz enerji sektorunda uğurlu əməkdaşlığı dəstəkləyir. Biz Bakı-Tbilisi-Ceyhan neft kəməri ilə neftin nəqli həcmlərini artırmaq niyyətindəyik. Ticarət və iqtisadiyyat üzrə hökumətlərarası komissiya çərçivəsində fəal iş aparılır. Ümid edirəm ki, bugünkü görüş gələcək üçün yeni prioritetlərin müəyyən edilməsinə töhfə verəcək", - Tokayev deyib.
Onun sözlərinə görə, ticarət-investisiya qarşılıqlı fəaliyyəti ikitərəfli münasibətlərin əsası olaraq qalır. Qlobal qeyri-sabitliyə baxmayaraq, iki ölkə arasında əmtəə dövriyyəsinin gələcək artım potensialı var. Tokayev qeyd edib ki, Qazaxıstan Gürcüstan iqtisadiyyatına yarım milyard dollardan çox sərmayə qoyub və hələ də ölkənin ən böyük investorları sırasındadır.
Tokayev həmçinin strateji tərəfdaşlığın qurulması haqqında imzalanmış birgə bəyanatın Qazaxıstan və Gürcüstan münasibətlərini keyfiyyətcə yeni səviyyəyə çıxaracağına əmin olduğunu bildirib. Qazaxıstan Prezidenti strateji tərəfdaşlığın gələcək inkişafına aydın struktur verməyi və energetika, investisiyalar, nəqliyyat əlaqəsi, kənd təsərrüfatı, rəqəmsallaşdırma, turizm və digər perspektivli istiqamətlərə yönəlmiş "yol xəritəsi" hazırlamağı təklif edib.
Transxəzər Beynəlxalq Nəqliyyat Marşrutunun (TBNM) inkişafına xüsusi diqqət yetirilib. Layihənin əsas iştirakçıları kimi Qazaxıstan və Gürcüstan nəqliyyat-logistika infrastrukturunun inkişafı, konteyner daşımalarının genişləndirilməsi, tarif siyasətinin razılaşdırılması və rəqəmsallaşdırmanın sürətləndirilməsi üzrə ardıcıl tədbirlər görmək niyyətindədir. Qeyd edilib ki, son beş ildə TBNM üzrə tranzit daşımalarının həcmi 3,5 dəfə artıb və 2029-cu ilə qədər marşrut üzrə hərəkət edən konteyner qatarlarının sayının 3 minə çatacağı gözlənilir.
Batumi limanından başqa, Qazaxıstan Gürcüstanın digər liman zonalarında da iştirakını genişləndirməkdə maraqlıdır. Xüsusilə, ötən il qazaxıstanlı investorların iştirakı ilə Potidə yeni multimodal terminal açılıb. Regionlararası əlaqələrin gücləndirilməsi üçün Anakliya limanı da perspektivli layihə adlandırılıb.
