Ermənistan parlamentinin yeni spikeri ortalığı qatdı - "TÜRK" imiş
Ermənistan parlamentinin sədr müavini Ruben Rubinyan brifinqdə onun Türkiyə ilə danışıqlar üzrə xüsusi nümayəndə olduğu üçün Milli Məclis sədrliyinə namizəd göstərilməsinin Ankaraya jest olduğu barədə iddialara münasibət bildirib.
TodayPress TV xəbər verir ki, o, belə iddiaların doğru olmadığını deyib.
“Əvvəlcə sizi məlumatlandırmaq istəyirəm ki, bəli, Milli Məclisin sədri vəzifəsinə namizəd göstərilmişəm. Seçiləcəyim təqdirdə isə aydındır ki, Türkiyə ilə danışıqlarda Ermənistanın xüsusi nümayəndəsi kimi fəaliyyətimi davam etdirməyəcəm. Beləliklə, onların irəli sürdüyü konspiroloji nəzəriyyənin təxminən 90 faizi puç olur.
Bu cür iddialar Ermənistan xalqına qarşı hörmətsizlikdir. Çünki Ermənistanda bütün dövlət vəzifələrinə təyinatlar dolayı yolla da olsa, ölkə xalqının iradəsi ilə formalaşır”, - Rubinyan qeyd edib.
Gələcək parlament sədri Türkiyədə təhsil alması iddiasını da təkzib edərək, bunu “yalan” adlandırıb:
“Yalan danışırlar. Mən Türkiyədə universitetə getməmişəm, orada təhsil almamışam, Türkiyə diplomum yoxdur. Tələbəlik illərimi əvvəlcə Ermənistanda, 2006-2010-cu illərdə İrəvan Dövlət Universitetində keçirmişəm. Daha sonra 2010-2011-ci illərdə Londonda magistr təhsili almışam. Ardınca 2011-2012-ci illərdə Polşada ikinci magistr proqramını bitirmişəm. Həmin təhsil müəssisələrində də türk müəllimlərdən dərs almamışam”.
Rubinyan əlavə edib ki, 2016-2017-ci illərdə cəmi beş ay ərzində Hrant Dink Fondunun proqramında iştirak edib:
“Hrant Dink Fondunun nə olduğunu xatırladım. Türkiyədə erməniəsilli jurnalist Hrant Dink vardı. Səhv etmirəmsə, 2007-ci ildə İstanbulda küçədə öldürülüb. Ardınca onun adını daşıyan və Hrant Dinkin qızı tərəfindən idarə olunan fond yaradıldı. Həmin fondun, səhv etmirəmsə, erməni dilində “Sərhədin o tayında” adlı proqramı var idi. Bu proqram Ermənistan vətəndaşlarına Türkiyədə, Türkiyə vətəndaşlarına isə Ermənistanda müvafiq olaraq təcrübə keçmək imkanı yaradırdı”.
Xatırladaq ki, Ruben Rubinyan Ermənistanın hakim “Vətəndaş Müqaviləsi” Partiyasının İdarə Heyətində keçirilən gizli səsvermədə parlament sədrliyinə namizəd seçilib. Bu postda o, hazırkı spiker Alen Simonyanı əvəzləyəcək.
