ABŞ geri addım atdı – "F-35"lər Türkiyəyə verilir?

ABŞ Prezidenti Donald Tramp Türkiyə Prezidenti Rəcəb Tayyib Ərdoğana Vaşinqtonun Ankaraya beşinci nəsil F-35 qırıcılarının satışına icazə verməyə hazır olduğu barədə məlumat verə bilər.

TodayPress TV   xəbər verir ki, bu barədə “The New York Times” qəzeti mənbələrə istinadən yazıb.

Nəşrin məlumatına görə, Trampın bu qərarı hansı mexanizmlə həyata keçirəcəyi və Konqresin Türkiyəyə F-35 satışına qoyduğu məhdudiyyəti necə aradan qaldıracağı hələlik məlum deyil.

ABŞ administrasiyasındakı mənbələr hesab edirlər ki, Türkiyənin F-35 proqramına qayıdışı ilə bağlı proses liderlər arasında rəsmi məktub mübadiləsi yolu ilə başlaya bilər.

Qəzet qeyd edir ki, Tramp iyulun 7-də NATO sammitində iştirak etmək üçün Türkiyəyə səfər edəcək. Bununla yanaşı, ABŞ rəsmiləri Ağ Ev rəhbərinin son anda mövqeyini dəyişə biləcəyini də istisna etmirlər.

Xatırladaq ki, ABŞ 2019-cu ildə Türkiyənin Rusiyadan S-400 hava hücumundan müdafiə sistemləri almasını əsas gətirərək Ankaranı F-35 proqramından çıxarmışdı. Vaşinqton həmin vaxt Türkiyənin həm S-400, həm də F-35 sistemlərindən istifadə etməsinin qırıcıların texniki xüsusiyyətləri barədə məlumatların əldə olunmasına səbəb ola biləcəyini bildirmişdi.

İyunun sonunda Euractiv portalı ABŞ-ın Türkiyə S-400 sistemlərindən imtina edəcəyi təqdirdə F-35 satışını yenidən nəzərdən keçirə biləcəyini yazmışdı. Məlumata görə, variantlardan biri həmin sistemlərin Rusiyaya qaytarılmadan üçüncü ölkəyə satılmasıdır.

Qeyd olunur ki, İsrail və Yunanıstan da Türkiyəyə F-35 təyyarələrinin verilməsinə qarşı çıxırlar. Hər iki ölkə hesab edir ki, bu addım regiondakı hərbi qüvvələr balansını dəyişə bilər.