Vaşinqton “İbrahim sazişləri”nə cığır açır: Azərbaycana və Ermənistanın cavabı nə olacaq?

“Azərbaycanın "İbrahim sazişləri"nə qoşulması ölkəyə iqtisadi və texnoloji inkişaf baxımından yeni imkanlar aça bilər”.

Politoloq Rəşad Bayramov bunu TodayPress TV-yə danışarkən deyib.

Onun sözlərinə görə, “İbrahim sazişi” layihəsinin ilkin məqsədi Yaxın Şərqdə mövcud olan yəhudi-ərəb düşmənçiliyinə son vermək və bu iki millət arasında sülhü tənim etməklə iqtisadi əməkdaşlığı stimullaşdırmaqdan ibarətdir:

“Əgər o konteksdən yanaşsaq, Azərbaycanın “İbrahim sazişləri”nə qoşulması ilk baxışdan mənasız bir şey kimi görünə bilər. Çünki bizim İsraillə istənilən sahədə onsuz da kifayət qədər yaxşı münasibətlərimiz var. Lakin bu saziş artıq yeni dövlətlərin də qoşulması ilə daha geniş coğrafiyada təhlükəsizlik, iqtisadiyyat və texnologiya sahələrində əməkdaşlığın təmin edilməsini nəzərdə tutur. Başqa sözlə desək, sazişin ilkin hədəfinin, yəni yəhudi və ərəblər arasında düşmənçiliyə son vermək hədəfinin artıq arxada qaldığını nəzərə alaraq deyə bilərik ki, Azərbaycanın "İbrahim sazişləri"nə qoşulması ölkəyə iqtisadi və texnoloji inkişaf baxımından yeni imkanlar aça bilər”.

Ekspert qeyd edib ki, xüsusilə də ölkəmizin Şərqlə Qərb, İsrail ilə müsəlman dünyası arasında körpü rolunu oynaya bilmə potensialı, Azərbaycanın Şərq–Qərb və Şimal–Cənub dəhlizlərinin kəsişməsində yerləşməsi xarici siyasətdə manevr imkanlarının genişləndirilməsində yeni imkanlar əldə etməyə imkan verə bilər:

“Nəticədə biz İsraillə yanaşı, “İbrahim sazişləri”nə qoşulmuş digər dövlətlərlə, BƏƏ, Bəhreyn, Mərakeş və Sudan kimi ərəb ölkələri ilə və eləcə də bundan sonra sazişə qoşulacaq digər dövlətlərlə diplomatik və iqtisadi əlaqələri genişləndirmək üçün əlavə imkanlar əldə edə bilərik. Təbii ki, bu sazişə qoşulmağımız heç bir halda müstəqil qərarlar qəbul etmə və müstəqil xarici siyasət kursu həyata keçirmək imkanlarımızı məhdudlaşdırmamalıdır. Düşünürəm ki, bu sazişdə iştirakla bağlı qərarın Türkiyə ilə koordinasiyalı şəkildə verilməsinə, eləcə də bunun anti-İran alyansı kimi təqdim edilməməsinə də diqqət yetirmək lazımdır. Çalışmaq lazımdır ki, “İbrahim sazişləri”ndə iştirakımız sazişdə olmayan digər müsəlman ölkələri ilə münasibətlərimizdə hər hansı problemləri ortaya çıxarmasın”.

Qeyd edək ki, ABŞ prezidenti Donald Trampın Yaxın Şərq üzrə xüsusi nümayəndəsi Stiven Uitkoff bəyan edib ki, Vaşinqton yaxın zamanda Azərbaycana və Ermənistana “İbrahim sazişləri”nə qoşulmağı təklif etməyi planlaşdırır. Bildirilib ki, bu, beynəlxalq platforma region ölkələri ilə İsrail arasında münasibətlərin normallaşdırılmasına xidmət edir.

Qiymət Mahir