"Putin üçün vacib platforma..." — KTMT-də mühüm qərarlar qəbul ediləcək!
"Kollektiv Təhlükəsizlik Müqaviləsi Təşkilatının (KTMT) növbəti Zirvə toplantısı noyabrın 25-də öz işinə başlayıb və toplantı 27 noyabr tarixinə qədər davam edəcək. Bu dəfə Zirvə toplantısı Qırğızıstanın paytaxtı Bişkek şəhərində təşkil olunub və Rusiya Prezidenti Vladimir Putinin də iştirak edəcəyi gözlənilir".
Politoloq Çingiz Şahbazi bunu TodayPress TV-yə açıqlamasında deyib.
O bildirib ki, Zirvə toplantısında bir sıra mühüm qərarların qəbul edilməsi planlaşdırılır:
"Zirvə toplantısı üzv ölkələr üçün strateji baxımdan böyük əhəmiyyət daşıyır. Sammitdə üzv dövlətlər hazırkı təhlükəsizlik məsələləri ilə bağlı ortaq mövqeləri əks etdirən Bəyannamə qəbul etməyi planlaşdırırlar. Bu, KTMT üzv dövlətlərinin birgə təhlükəsizliyi üçün mühüm əhəmiyyət kəsb edir. Bəyannaməyə terrorizm, ekstremizm, kiber təhlükələr və digər birgə mübarizə metodları daxildir.
Həmçinin sammitdə təşkilatın daxilində kadr və struktur dəyişiklikləri barədə müzakirələr aparılacaq. 2026-cı ildə təşkilata Rusiya sədrlik edəcək və indidən KTMT-nin Rusiya sədrliyi dövründə saxlanılacaq prioritetlər və strateji istiqamətlərlə bağlı üzv ölkələrin liderlərinə Rusiyanın təqdimatı gözlənilir. Belə hallar Rusiya siyasətinin elementləri arasında bütün dövrlərdə yer alıb və hazırda da KTMT üzərində təsiri gücləndirmək məqsədilə prioritet istiqamətlərdən biri kimi davam etdirilir".
Ekspertin sözlərinə gözə, sammit zamanı 10-dan çox sənədin imzalanması planlaşdırılır. Bu sənədlərə təhlükəsizlik məsələləri, terrorizm, ekstremizm, kiber təhlükəsizlik, qanunsuz miqrasiya və narkotrafiklə mübarizə sahələrində əməkdaşlıq daxildir.
Ç.Şahbazi əlavə edib ki, Rusiyanın sədrliyi həm simvolik, həm də strateji baxımdan böyük rol oynayır və regionda təsirini qoruyub saxlamaq baxımından önəmlidir:
"Putinin sammitdə iştirak etməsi və yüksək səviyyəli nümayəndə heyəti ilə təmsil olunması toplantıya verdiyi önəmi göstərir. Bu, sammitin yalnız formal və təhlükəsizlik xarakterli olmadığını, həm də beynəlxalq prestij baxımından əhəmiyyətli olduğunu nümayiş etdirir. Putin toplantının yüksək səviyyədə keçirilməsini təmin etməklə rəsmi Moskva üçün bu sammitin beynəlxalq prestijini artırmaq niyyətindədir. Onun sammitdə iştirakı Qırğızıstana səfər çərçivəsində Rusiyaya strateji üstünlük təmin edəcək və regional təhlükəsizlik mexanizmlərini gücləndirəcək".
Politoloqun fikrincə, bu Zirvə toplantısı KTMT-nin gələcək prioritetlərinin formalaşması üçün, Rusiya Prezidenti Vladimir Putin üçün vacib platforma hesab edilə bilər. Eyni zamanda Mərkəzi Asiya ölkələri üçün də sammit sabitlik, koordinasiya imkanları və potensial təhlükələrlə birgə mübarizədə mühüm dialoq məkanı rolunu oynayır.
Qeyd edək ki, Kollektiv Təhlükəsizlik Müqaviləsi Təşkilatının (KTMT) növbəti sammiti 2026-cı il noyabrın 11-də Moskvada keçiriləcək.
Rusiya Prezidentinin köməkçisi Yuri Uşakovun sözlərinə görə, KTMT-nin noyabrın 25-27-də Qırğızıstanda keçiriləcək sammitində sədrliyin gələn il Rusiyaya keçməsi barədə qərar qəbul olunacaq.
Qiymət Mahir
