Millət vəkili: “Prezidentin bu mövqeyi milli yaddaşın yenilənməsi prosesini sürətləndirəcək”
Prezident İlham Əliyev Azərbaycan Milli Elmlər Akademiyasının 80 illik yubiley yığıncağında çıxışı zamanı bildirib ki, bütövlükdə müstəqil Azərbaycan dövlətinin tarixi ilə bağlı sanballı elmi əsərlərə də böyük ehtiyac var.
Dövlətimizin başçısı qeyd edib:
“Artıq 30 ildən çoxdur ki, biz müstəqil dövlət kimi yaşayırıq və Azərbaycan xalqının çoxəsrlik dövlətçilik tarixində Azərbaycan bugünkü qədər güclü olmamışdır. Ona görə müstəqil Azərbaycanın tarixini tədqiq edən, təbliğ edən bir çox əsərlərə ehtiyac var”.
Milli Məclisin deputatı Elçin Mirzəbəyli bu barədə TodayPress TV-yə danışarkən bildirib ki, Prezidentin səsləndirdiyi bu fikirlər ölkənin elmi və ideoloji inkişafında yeni mərhələnin başlanğıcını göstərir:
“Prezident İlham Əliyevin “bütövlükdə müstəqil Azərbaycan dövlətinin tarixi ilə bağlı sanballı elmi əsərlərə böyük ehtiyac var” fikri sadəcə akademik dairələr üçün deyil, bütövlükdə milli ideologiyanın gələcək istiqamətlərini müəyyən edən strateji proqram xarakterli çağırışdır. Dövlət başçısı bu çıxışında müasir Azərbaycan tarixinin yalnız faktlar və hadisələr üzərindən deyil, milli dövlətçilik düşüncəsinin formalaşması, müstəqillik ideyasının gerçəkləşməsi və suverenliyin qorunması prizmasından öyrənilməsinin vacibliyini vurğuladı”.
Deputatın sözlərinə görə, Prezidentin bu mövqeyi həm elmi, həm siyasi, həm də mənəvi baxımdan milli yaddaşın yenilənməsi prosesini sürətləndirəcək:
“Bu çağırış, əslində, elmi ictimaiyyət üçün dövlət səviyyəsində prioritetlərin müəyyənləşdirilməsidir. Tarixin yalnız keçmişin salnaməsi kimi deyil, dövlət quruculuğunun fəlsəfəsini, milli kimliyimizi və ideoloji dayaqlarımızı izah edən strateji bilik sahəsi kimi təqdim edilməsi tələb olunur. Prezidentin “Azərbaycan bugünkü qədər güclü olmamışdır” fikri bu baxımdan həm müstəqil dövlətçilik təcrübəsinin, həm də milli özünüdərkin ən yüksək mərhələyə çatdığını göstərir”.
Parlamentari diqqətə çatdırıb ki, Azərbaycan tarix elminin qarşısında duran əsas vəzifə artıq sadəcə xronoloji tədqiqatlarla məhdudlaşmamalı, elmi araşdırmaların dövlət siyasəti ilə uzlaşdırılması, milli maraqlara xidmət edən konseptual yanaşma formalaşdırılmalıdır:
“Sovet dövründə milli tarix ideoloji senzura altında təhrif olunur, dövlətçilik ənənələrimiz kölgədə saxlanılırdı. Bu gün isə tarix elmi faktların deyil, milli güc və məsuliyyət anlayışının elmi əsaslarla izahını verməlidir. Prezidentin çıxışı bu baxımdan elmin dövlətçilik missiyasını daha da gücləndirir”.
E.Mirzəbəylinin qənaətincə, dövlət başçısının “tədqiq” və “təbliğ” anlayışlarını yanaşı işlətməsi də xüsusi məna daşıyır:
“Tarixi tədqiq etmək onu sənədlərlə təsdiqləməkdirsə, təbliğ etmək bu həqiqətləri beynəlxalq səviyyədə təqdim etmək və Azərbaycan reallıqlarını müdafiə etmək deməkdir. Qarabağ müharibəsindən sonra formalaşan yeni reallıqlar kontekstində tarix elminin bu istiqamətdə rolu daha da artıb. Artıq tarix həm də informasiya savaşının əsas alətinə çevrilib”.
Millət vəkili hesab edir ki, Prezident İlham Əliyevin çıxışı təkcə elmi institutlara deyil, bütövlükdə ziyalı təbəqəsinə ünvanlanmış strateji istiqamət kimi dəyərləndirilməlidir:
“Bu çağırış tarixi yalnız öyrənmək deyil, onu dövlətçilik ideyası ilə sintez etmək, milli özünüdərk və elmi obyektivlik əsasında gələcək nəsillərə ötürmək məqsədi daşıyır. Elm və ideologiyanın bu sintezi Azərbaycanın suverenliyini möhkəmləndirən əsas dayaqlardan birinə çevriləcək. Prezidentin təşəbbüsü tarix elmini milli ideologiyanın strateji sütunu səviyyəsinə yüksəldir”.
Qiymət Mahir
