300 min azərbaycanlının ayaq səsi İrəvanda eşidildi: Karapetyan say açıqladı

"Moskvalı oliqarx" Samvel Karapetyan yenə İrəvanın siyasi kulisini ortalığa töküb. Çox narahatdırlar. Onun son açıqlamasında isə qorxunu iliklərinə kimi hiss etdikləri açıq-aydın sezilir.

Karapetyan deyir: "300.000 azərbaycanlının "hücumu" (300.000 azərbaycanlının öz doğma torpaqları - Qərbi Azərbaycana qayıtmasını nəzərdə tutur)  qayıtmasında  zamanı heç bir hərbi parad Ermənistanı qoruya bilməz. Əgər ayıq olmasaq, Ermənistan türkcə danışmağa başlayacaq".

Onun fikirləri köhnə siyasi düzənin dağılması ilə bağlı dərin qorxunu biruzə  verir. 

Karapetyan və onun təmsil etdiyi çevrələr uzun illər Ermənistan cəmiyyətini qorxu üzərində idarə edən sistemin əsas sütunları olublar. Regionda yeni siyasi reallığın formalaşması, sərhədlərin delimitasiyası və sülh prosesinin irəliləməsi onlar üçün illərlə istifadə etdikləri "düşmən obrazı" siyasətinin iflası deməkdir.  Erməni cəmiyyətinə psixoloji təsir rıçaqlarını işə salan revanşist müxalif dairələr hələ də reallıqları həzm etməkdə çətinlik çəkir, sadə vətəndaşları da öz bataqlıqlarına çəkmək istəyirlər.

Ümumiyyətlə, bir şeyi dərk etmək lazımdır ki, müharibə dövlətlərin sərhədlərini dəyişə bilər, amma xalqların dilini və kimliyini zorla dəyişdirmək nə bu regionda, nə də dünyada asan baş verən proses olmayıb. 

Azərbaycanın dövlət siyasəti də heç vaxt başqa xalqların assimilyasiyasına yönəlməyib. Rəsmi Bakının əsas məqsədi beynəlxalq hüququn təmin olunması, kommunikasiyaların açılması və regionda iqtisadi əməkdaşlığın tam genişləndirilməsidir.

Karapetyanın dərdi nə dil məsələsidir, nə də azərbaycanlıların öz doğma yurduna qayıtması. Onun üçün əsas məsələ cibinin dolmasıdır, mənbəyi bəlli olmasa da. Onun və onun kimi düşünənlərin qorxusu Ermənistanın yeni regional reallıqlara uyğunlaşması, Azərbaycan və digər qonşularla normal münasibətlər qurması, nəticədə isə xarici güclərin bölgədəki təsir imkanlarının zəifləməsidir.

Onlar yaxşı anlayırlar ki, sülh müqaviləsi imzalandıqdan sonra uzun illər istifadə etdikləri "xarici düşmən" kartı əvvəlki təsirini itirəcək.

Məhz buna görə də cəmiyyətdə gərginliyi qorumaq, köhnə qorxuları yenidən gündəmə gətirmək və emosional çağırışlarla insanları səfərbər etmək cəhdlərini artırırlar. 

Bu da seçki ərəfəsində (iyunun 7-də Ermənistanda parlament seçkiləri keçiriləcək) siyasi səhnədə tamaşaçı toplamaq üçün qurulan növbəti şou...

Jalə Rövşən