Böyük Britaniyada qızılca həyəcanı: Yayda yoluxma artışı gözlənilir

Böyük Britaniya Səhiyyə Təhlükəsizliyi Agentliyi (UKHSA) yay tətili mövsümü yaxınlaşdıqca ölkədə qızılca xəstəliyinin yayılmasının daha da sürətlənə biləcəyi barədə xəbərdarlıq edib.

TodayPress TV "Xinhua"ya istinadən xəbər verir ki, UKHSA-nın son məlumatına əsasən, 2025-ci ilin 1 yanvarından bu günə qədər İngiltərədə 420 laboratoriya tərəfindən təsdiqlənmiş qızılca halı qeydə alınıb.

Aprel ayında 109, mayda isə 86 yoluxma aşkarlanıb. Ən çox yoluxma Londonda baş verib – bu şəhər təkcə bu il ərzində 420 halın 163-nə (39%) ev sahibliyi edib. Son 4 həftədə qeydə alınan 75 yoluxmanın da 47%-i (35 hal) Londona aiddir.

Yoluxmaların böyük əksəriyyəti – 66 faizi (276 hal) 10 yaş və daha aşağı yaşlı uşaqlarda qeydə alınıb.

Agentlik bildirir ki, yay aylarında beynəlxalq səyahətlərin artması xəstəliyin həm daxildə, həm də xaricdə geniş yayılmasına səbəb ola bilər. Xüsusilə də nəzərə alınmalıdır ki, qızılca bu gün də dünyanın bir çox bölgəsində endemik olaraq qalır.

Cari ildə qızılca ilə bağlı epidemiyalar Fransa, İtaliya, İspaniya və Almaniya kimi Avropa ölkələrində də müşahidə olunub. Ümumdünya Səhiyyə Təşkilatı (ÜST) isə bildirib ki, Rumıniya, Pakistan, Hindistan, Tailand, İndoneziya və Nigeriya dünyada ən çox yoluxma qeydə alınan ölkələr sırasındadır.

UKHSA valideynləri övladlarının qızılca, parotit və qızılcaçığa qarşı qoruyucu olan MMR peyvəndi ilə tam peyvənd olunduğuna əmin olmağa çağırıb.

“Səyahət planlaşdıran hər kəs, xüsusilə azyaşlı uşaqları olan ailələr, ailə üzvlərinin hamısının 2 doza MMR peyvəndi aldığını yoxlamalıdır”, – deyə UKHSA-nın epidemioloqu Dr. Vanessa Saliba vurğulayıb.

Qiymət Mahir