Aİ borc axtarışında: COVID-19 ödənişlərinin vaxtı yaxınlaşır

Avropa Komissiyası bu gün 2028–2034-cü illəri əhatə edən yeni büdcə çərçivəsi ilə bağlı təklifini təqdim edəcək. Təklif üzərində Avropa İttifaqına (Aİ) üzv ölkələr və Avropa Parlamenti danışıqlara başlayacaq.

TodayPress TV xəbər verir ki, bu barədə "Reuters" məqalə yazıb. 

Əsas diqqət müdafiə xərclərinin artırılmasına yönəlib. Lakin ölkələr arasında büdcənin haradan maliyyələşdiriləcəyi və ümumi həcminin artırılıb-artırılmayacağı ilə bağlı fikir ayrılığı var.

Eyni zamanda, COVID-19 pandemiyası dövründə götürülən 807 milyard avroluq borcun qaytarılması və rəqabət qabiliyyətinin artırılması üçün də əlavə vəsait tələb olunur. Bu borcun ödənişlərinə 2028-ci ildən başlanacağı və büdcənin 20 faizinə qədərini təşkil edə biləcəyi gözlənilir.

Maliyyə mənbələrinə gəlincə, Komissiya yeni vergi və rüsumlar təklif edir. Onlar arasında iri şirkətlər üçün yeni vergi, tütün və istifadə olunmuş elektronika vergisi də var.

Büdcənin 60%-i hazırda kənd təsərrüfatı və regional inkişaf xərclərinə gedir. Bəzi dairələr bu sahələrdə islahatlar tələb edir. Eyni zamanda, Ukraynanın mümkün üzvlüyü gələcəkdə dəstək siyasətinə ciddi təsir edə bilər.

Finlandiya və digər “xalis donor” ölkələr büdcənin həddindən artıq böyüməsinə qarşı çıxır. Finlandiyanın Baş naziri Petteri Orpo qeyd edib ki, büdcə yalnız müdafiə xərcləri naminə artırıla bilər.

Büdcənin rəqabətliliyə yönəldilməsi də əsas prioritetlərdəndir. Avropa Komissiyası ABŞ-nin sənaye dəstək proqramına qarşı “rəqabət fondunu” təsis etməyi təklif edir. Burada rəqəmsal texnologiyalar və müdafiə sahəsində layihələr maliyyələşdirilə bilər.

Nəticə olaraq, yeni büdcə çərçivəsi Aİ üçün maliyyə, iqtisadi və geosiyasi baxımdan mühüm dönəmi əhatə edəcək və üzv dövlətlərin maraqlar balansını tələb edəcək.

Töhfə Səməd