Bakıya girmədən regionlara getmək mümkün olacaq? - Ekspert açıqladı
Azərbaycanda geniş müzakirə olunan məsələlərdən biri də ölkənin turizm marşrutları arasında birbaşa yol əlaqələrinin məhdud olmasıdır. Belə ki, xarici turistlərdən biri Şahdağ Turizm Mərkəzindən Qəbələyə getmək istəyərkən xəritədə məsafənin yaxın görünməsinə baxmayaraq, mövcud yol şəbəkəsinə görə xeyli geri qayıtmalı olduğunu paylaşaraq buna təəccübünü ifadə edib. Bu hal regionlar arasında alternativ yol bağlantılarının yaradılması məsələsini yenidən gündəmə gətirib.
Mövzu ilə bağlı TodayPress TV-yə danışan nəqliyyat eksperti Rauf Ağamirzəyev bildirib ki, Quba, Şamaxı və Qəbələ istiqamətlərini daha qısa marşrutlarla birləşdirəcək yollar uzun illərdir müzakirə olunur və bu istiqamətdə artıq müəyyən işlər görülüb.
"Bu mövzu vaxtaşırı gündəmə gəlir. Xüsusilə 2019-cu ildə Quba–Qonaqkənd yolu yenidən qurulduqdan sonra məsələ daha da aktuallaşdı. Hazırda həmin marşrut üzrə Qonaqkənd–Qızmeydan–Şamaxı hissəsinin tamamlanmasına ehtiyac var ki, əlaqə tam təmin olunsun".
Mütəxəssis qeyd edib ki, Şahdağdan Qəbələyə Böyük Qafqaz dağlarının altından birbaşa yol çəkilməsi texniki baxımdan mümkün olsa da, iqtisadi cəhətdən səmərəli hesab edilmir:
"Böyük Qafqazın altından uzun tunellərlə birbaşa yolun çəkilməsi həm texniki, həm də maliyyə baxımından olduqca mürəkkəb layihədir. Belə layihələr böyük həcmdə investisiya tələb edir və iqtisadi baxımdan özünü doğrultmaya bilər. Daha real və səmərəli variant Qonaqkəndlə Şamaxının birləşdirilməsidir. Yolun bir hissəsi artıq Qonaqkəndə qədər mövcuddur. Buradan Şamaxıya, daha sonra isə İsmayıllı, Basqal, Dəmirçi və Altıağac istiqamətlərinə rahat çıxış yaratmaq mümkündür. Bunun üçün uzun tunellərə ehtiyac yoxdur. Ayrı-ayrı hissələrdə qısa tunellər və körpülər tikilməklə layihəni həyata keçirmək olar".
Ekspert vurğulayıb ki, həmin istiqamətdə hazırda yolsuzluq avtomobillərinin istifadə etdiyi qrunt yol mövcuddur:
"Səhv etmirəmsə, həmin ərazidə yolsuzluq avtomobillərinin istifadə etdiyi qrunt yol var. Bir çox sürücü bu marşrutdan istifadə edərək bunun mümkün olduğunu göstərib. Lakin müasir standartlara cavab verən avtomobil yolunun inşasına ehtiyac var. Belə bir layihə təkcə turizmin inkişafına deyil, həm də ölkənin nəqliyyat sisteminin güclənməsinə xidmət edər. Bu marşrut Şimal–Cənub nəqliyyat dəhlizi üçün alternativ rolunu da oynaya bilər. Beləliklə, şimal bölgəsindən qərb istiqamətinə və əksinə hərəkət edən nəqliyyat vasitələri Bakıya daxil olmadan hərəkət edə bilər. Bu isə həm vaxt itkisini azaldar, həm də yeni turizm marşrutlarının formalaşmasına ciddi töhfə verər".
O bildirib ki, Qarabağ və Şərqi Zəngəzurda həyata keçirilən iri yol layihələrinin böyük hissəsi artıq yekunlaşmaq üzrədir. Onun fikrincə, növbəti mərhələdə diqqət ölkənin digər bölgələrində alternativ yol şəbəkəsinin genişləndirilməsinə yönəldilməlidir:
"Söhbət yalnız Quba, Şamaxı və İsmayıllı arasında qısa yol əlaqələrinin yaradılmasından getmir. Gələcəkdə Samuxdan Mingəçevir su anbarının şimal hissəsi vasitəsilə Qax istiqamətinə çıxışı təmin edəcək yollar da nəzərdən keçirilə bilər. Eyni zamanda, Bakı ətrafında alternativ yol layihələrinin inkişafı paytaxtda nəqliyyat sıxlığının azalmasına kömək edər. Bakıya daxil olmadan hərəkəti təmin edən yolların sayı artırılmalıdır. Məsələn, Tağıyev sahil yolunun dördzolaqlı şəkildə yenidən qurulması paytaxta daxil olan nəqliyyat axınını əhəmiyyətli dərəcədə azalda bilər. Hesab edirəm ki, bu cür layihələrin həyata keçirilməsinin vaxtı artıq çatıb".
Ekspert əlavə edib ki, son illərdə irəli sürdüyü bir sıra təkliflər artıq dövlət proqramlarına daxil edilərək icra olunur:
"Son altı-yeddi il ərzində bu istiqamətdə mütəmadi təkliflərlə çıxış etmişəm. Son təqdim etdiyim layihələrin böyük hissəsi artıq icra mərhələsindədir. Bunlara 'Monolit' qovşağının Babək prospekti ilə əlaqələndirilməsi, Xəlil Rza Ulutürk küçəsinin Volodarski küçəsi və Keşlə bazarı istiqamətinə birləşdirilməsi daxildir. Regionlarla bağlı irəli sürdüyüm Quba–Şamaxı–Qəbələ marşrutu və digər alternativ yol layihələri də gələcəkdə nəzərdən keçirilə bilər".
Rauf Ağamirzəyev hesab edir ki, alternativ yolların sayının artması ölkəyə həm iqtisadi, həm də sosial baxımdan mühüm üstünlüklər qazandıracaq.
"Alternativ yollar nə qədər çox olarsa, ölkə üçün bir o qədər faydalı olar. Belə marşrutlar riskləri azaldır, regionlararası inteqrasiyanı sürətləndirir, iqtisadi və sosial əlaqələrin inkişafına təkan verir. Hesab edirəm ki, geniş iqtisadi təhlillər aparılaraq ən səmərəli layihələr mərhələli şəkildə həyata keçirilə bilər", - deyə o, fikrini tamamlayıb.
Türkan İsgəndərli
