Tarix müəllimi nazirliyi prezident administrasiyasına şikayət etdi
Müəllimlər sertifikasiya imtahanı ilə bağlı narazılıqlarını bildiriblər.
TodayPress TV xəbər verir ki, bu mövzuda tarix müəllimi Samir Bəşirli çıxış edib.
O, sosial şəbəkədə paylaşdığı açıqlamada həm sertifikasiya, həm də müəllimlərin işə qəbulu (MİQ) prosesində yol verildiyini iddia etdiyi hüquq pozuntularının aidiyyəti dövlət qurumlarının diqqətinə çatdırılacağını qeyd edib.
Müəllim bildirib ki, bir müddət əvvəl 100-dən çox müəllimin imzası ilə Azərbaycan Prezidentinə müraciət ünvanlanıb və həmin müraciətin davamı olaraq Prezident Administrasiyasında qəbul üçün qeydiyyatdan keçiblər:
"Bir müddət əvvəl cənab Prezidentə 100-dən artıq müəllimin imzası ilə müraciət ünvanlanmışdı. Bu gün bu məsələ ilə bağlı Prezident Administrasiyasının qəbul şöbəsində oldum və iki həmkarımla birlikdə Humanitar siyasət şöbəsinin müdiri Fərəh Əliyevanın qəbuluna yazıldıq. Görüş zamanı müəllimlərin bütün problemləri, MİQ və sertifikasiya sahəsində baş verdiyini düşündüyümüz hüquq pozuntuları səsləndiriləcək".
Samir Bəşirli əlavə edib ki, sertifikasiya imtahanlarının apellyasiya mərhələsində ən ciddi problemlərdən biri iştirakçılara imtahan suallarının təqdim edilməməsidir:
"Apellyasiya prosesində ən böyük qanunsuzluq imtahan suallarının bizə təqdim olunmamasıdır. Bizim əlimizdə suallar olmadan, hansı suala necə cavab verdiyimizi bilmədən, səhvin harada olduğunu görmədən necə apellyasiya verməyimiz mümkündür? Bu, başadüşülən deyil. Bu məsələ ilə bağlı bir qrup müəllim Azərbaycan Respublikasının Təhsil İnstitutunda olub və rəhbərliklə görüş keçirib. Bu gün həmkarlarımızla birlikdə Təhsil İnstitutuna gedərək imtahan nəticələri və suallarla tanış olmaq istəyimizi bildirdik. Bizi direktor müavini qəbul etdi. Görüş zamanı arqumentlərimizi faktlarla əsaslandırdıq. Lakin səsləndirdiyimiz məsələlərə konkret və hüquqi əsaslandırılmış cavab ala bilmədik. Bizə yalnız 'araşdırılır', 'baxılır' kimi ümumi ifadələr deyildi".
Müəllim vurğulayıb ki, imtahan suallarının təqdim edilməsinin mümkün olmadığı barədə verilən izahlarla razı deyil:
"Telefon danışığında bizə bildirildi ki, imtahan suallarını təqdim etmək mümkün deyil. Hesab edirəm ki, bu yanaşmanın hüquqi əsası yoxdur. Mənə izah edildi ki, həmin məlumatların daşıyıcısı Təhsil İnstitutu deyil. Deməli, nəticələr və suallarla tanış olmaq üçün Məktəbəqədər və Ümumi Təhsil üzrə Dövlət Agentliyinə müraciət edilməlidir. Rəsmi ərizəmiz artıq təqdim olunub və ümid edirik ki, müəllimlərə öz nəticələri və sualları ilə tanış olmaq üçün şərait yaradılacaq".
Tarixçi bu prosesdə müxtəlif bölgələrdən Bakıya gələn həmkarlarına da təşəkkür edib:
"Bu isti yay günlərində uzaq rayonlardan vaxt ayıraraq gələn bütün müəllimlərə təşəkkür edirəm. Onların arasında yüksək nəticə göstərən, 50 baldan yuxarı toplayan və əməkdar müəllimlər də var. Onların bu məsələdə nümayiş etdirdiyi mübarizə əzmi hər cür qiymətləndirmədən daha dəyərlidir", – deyə Samir Bəşirli fikrini tamamlayıb.
Türkan İsgəndərli
ФОТО
