Burun çəpərində əyrilik nə zaman problem yaradır? Səbəblər və həll yolları
Burun çəpərinin (septumun) əyriliyi bir çox insanlarda rast gəlinən anatomik xüsusiyyətdir.
TodayPress TV xəbər verir ki, mütəxəssislərin sözlərinə görə, yüngül əyriliklər əksər hallarda ciddi narahatlıq yaratmasa da, bəzi hallarda nəfəsalma problemlərinə və digər sağlamlıq şikayətlərinə səbəb ola bilər.
Həkimlər bildirirlər ki, burun çəpərinin əyriliyi əsasən anadangəlmə olur və ya uşaqlıq dövründə, eləcə də sonrakı yaşlarda alınan travmalar nəticəsində meydana çıxır. Əyrilik burun boşluqlarından birinin daralmasına səbəb olduqda nəfəsalma çətinləşir.
Ekspertlərin fikrincə, aşağıdakı əlamətlər burun çəpərindəki əyriliyin problem yaratdığını göstərə bilər:
• Burundan nəfəs almaqda çətinlik;
• Tez-tez burun tutulması;
• Təkrarlanan sinusit və digər burun-ətrafı ciblərin iltihabları;
• Gecələr xoruldama və yuxu pozğunluqları;
• Burun qanamaları;
• Baş ağrıları və üz nahiyəsində təzyiq hissi.
Həkimlər qeyd edirlər ki, diaqnoz qulaq-burun-boğaz müayinəsi zamanı qoyulur. Bəzi hallarda endoskopik müayinə və ya görüntüləmə üsullarından istifadə edilə bilər.
Müalicə üsulu əyriliyin dərəcəsindən və yaratdığı şikayətlərdən asılıdır. Yüngül hallarda dərman preparatları və burun spreyləri simptomların azaldılmasına kömək edə bilər. Lakin nəfəsalma ciddi şəkildə pozulduqda və ya xəstə tez-tez sinus problemləri yaşadıqda cərrahi müdaxilə – septoplastika əməliyyatı tövsiyə olunur.
Mütəxəssislər vurğulayırlar ki, burun çəpərində əyrilik hər zaman əməliyyat tələb etmir. Əsas göstərici xəstənin həyat keyfiyyətinə təsir edən simptomların olub-olmamasıdır. Vaxtında aparılan müayinə və düzgün müalicə nəfəsalma funksiyasının bərpasına və əlaqəli problemlərin aradan qaldırılmasına kömək edir.
Türkan İsgəndərli
