Azərbaycanlı generalın qarşısına çıxan İran sərhədçiləri - böyük müzakirə doğurdu

İyunun 1-də İran İslam Respublikası ərazisində yerləşən Astara dövlət sərhəd-keçid məntəqəsində Azərbaycan Dövlət Sərhəd Xidmətinin rəisi general-polkovnik Elçin Quliyev və İran Hüquq-Mühafizə Qüvvələrinin baş komandanının müavini general-mayor Qasım Rzainin rəhbərliyi ilə nümayəndə heyətlərinin görüşü keçirilib.

Görüşdən geriyə qalan görüntülər heç də ürəkaçan deyil.   Qonşu ölkənin sərhəd xidmətinin rəhbərinin və öz komandanlığının qarşısına çıxarılan 10 nəfərlik fəxri qarovul dəstəsində iki əsgərin eynəkli olması, bir hərbçinin isə əlcəyini yarımçıq və səliqəsiz şəkildə geyinməsi sosial şəbəkələrdə müzakirələrə səbəb olub. Hələ bunlar nümayiş etdirilən “vitrin”dir. Görəsən, pərdəarxasında vəziyyət necədir?

Hərbi nəzəriyyədə fəxri qarovul ordunun siması sayılır. Əgər ən yüksək səviyyəli qonaqların və öz komandanlığının qarşısında belə görüntülər ortaya çıxırsa, bu, yalnız təsadüfi diqqətsizlik kimi qiymətləndirilə bilməz. Əsgər seçimi, hazırlıq səviyyəsi və formaların standartlara uyğunluğu sahəsində müşahidə olunan çatışmazlıqlar İranın hərbi gücü ilə bağlı səsləndirilən iddialı bəyanatların nə dərəcədə reallığı əks etdirdiyi barədə suallar doğurur.

İlk baxışda eynəkli əsgərlərin və ya yarımçıq geyinilmiş əlcəyin ciddi problem olmadığı düşünülə bilər. Ancaq fəxri qarovul dəstəsi kimi xüsusi hazırlıq keçən bir bölmədə bu cür detallara yol verilməsi hərbi protokolun icrasına kölgə salır və nizam-intizam məsələləri ilə bağlı suallar yaradır.

Hərbi qüdrət təkcə raketlərin, pilotsuz uçuş aparatlarının və ya canlı qüvvənin sayı ilə ölçülmür. Hərbi güc eyni zamanda yüksək nizam-intizam, dəqiq logistika, peşəkar şəxsi heyət və ən xırda detaladək düşünülmüş idarəetmə sistemi deməkdir. Təbliğatın formalaşdırdığı “məğlubedilməz ordu” obrazı ilə reallıq arasında yaranan bu ziddiyyət isə İranın hərbi sistemində mövcud olan problemlərlə bağlı müzakirələri  aktuallaşdırır.

Nəticədə belə bir sual ortaya çıxır: Əsgərinin əlcəyinə belə nəzarət edə bilməyən və ya buna kifayət qədər önəm verməyən bir hərbi sistem öz strateji və qlobal ambisiyalarını hansı təməl üzərində qurur? “Vitrin”də müşahidə olunan çatışmazlıqlar pərdəarxasında gizlənən daha ciddi problemlərin  əksidir. 

Jalə Rövşən