Sarkoidoz haqqında bilməli olduqlarınız: Diaqnozdan müalicəyə qədər
Sarkoidoz müxtəlif orqanlarda, xüsusilə ağciyərlərdə və limfa düyünlərində iltihabi hüceyrə yığıntılarının (qranulomaların) əmələ gəlməsi ilə xarakterizə olunan sistemik xəstəlikdir.
TodayPress TV xəbər verir ki, xəstəliyin dəqiq səbəbi hələ tam müəyyən edilməsə də, immun sisteminin müəyyən xarici və ya daxili təsirlərə qarşı həddindən artıq reaksiyası nəticəsində yarandığı hesab olunur.
Sarkoidozun əlamətləri xəstəliyin hansı orqanları zədələməsindən asılı olaraq dəyişir. Ən çox rast gəlinən simptomlar arasında davamlı quru öskürək, nəfəs darlığı, sinə ağrısı, yorğunluq, qızdırma, gecə tərləmələri və səbəbsiz çəki itkisi yer alır. Dəri tutulduqda qırmızı və ağrılı düyünlər, göz tutulduqda isə görmənin bulanıqlaşması, göz ağrısı və işığa həssaslıq müşahidə oluna bilər.
Sarkoidozun diaqnozu xəstənin şikayətləri və klinik müayinəsi əsasında başlanır. Diaqnozu dəqiqləşdirmək üçün döş qəfəsinin rentgenoqrafiyası, kompüter tomoqrafiyası, qan analizləri və digər laborator müayinələr aparılır. Bir çox hallarda diaqnozun təsdiqlənməsi üçün təsirlənmiş toxumadan biopsiya götürülərək mikroskopik müayinə edilir.
Xəstəliyin gedişi müxtəlif ola bilər. Bəzi insanlarda sarkoidoz heç bir xüsusi müalicə olmadan geriləyir, digərlərində isə uzunmüddətli və ya xroniki xarakter alır. Müalicə xəstəliyin ağırlığından və hansı orqanların zədələndiyindən asılı olaraq təyin edilir. Yüngül hallarda yalnız müşahidə kifayət edə bilər. Daha ağır hallarda isə iltihabı azaltmaq üçün kortikosteroidlər və digər immunosupressiv preparatlar istifadə olunur.
Müalicə olunmadıqda və ya ağır hallarda ağciyər fibrozı, ağciyər hipertenziyası, ürək ritm pozğunluqları, görmə problemləri və böyrək daşları kimi fəsadlar inkişaf edə bilər. Buna görə də xəstələrin mütəmadi olaraq həkim nəzarətində olması vacibdir.
Türkan İsgəndərli
