Lula da Silva: "ABŞ tarifləri Braziliya iqtisadiyyatı üçün əhəmiyyətsiz oldu"
Braziliya Prezidenti Luiz İnasio Lula da Silva 2025-ci ilin Braziliya üçün yaxşı başa çatdığını söyləyərək, ABŞ-nin Braziliya mallarına tarifi artırmasının ölkə iqtisadiyyatı üçün "əhəmiyyətsiz" olduğunu qeyd edib.
TodayPress TV xəbər verir ki, bu barədə “Xinhua” nəşri məlumat yayıb.
"İl yaxşı başa çatır. Ərzaq qiymətləri düşür və insanlar yenidən bahalaşmış əşyaları ala bilirlər. Hətta ABŞ-nin Braziliyaya tətbiq etdiyi tariflər belə əhəmiyyətsiz oldu", - deyə Lula da Silva daxili vəziyyət və ölkənin Vaşinqtonla münasibətləri barədə danışarkən bildirib.
O vurğulayıb ki, Braziliya iqtisadiyyatı Vaşinqtonun yeni ticarət siyasəti və onların yaratdığı geosiyasi və ticarət gərginlikləri qarşısında uyğunlaşma və dayanıqlılıq nümayiş etdirib. Daxili cəbhədə, xüsusilə də aztəminatlı ailələr üçün əsas problem olan ərzaq məhsullarının qiymətinin düşməsindən sonra əhalinin alıcılıq qabiliyyətinin tədricən yaxşılaşdığını açıqlayıb.
Prezidentin sözlərinə görə, bu proses ilin sonuna yaxınlaşdıqca Braziliyanın iqtisadi və sosial vəziyyətinin daha müsbət dəyərləndirilməsinə töhfə verir.
Aysel Mətləb
