Kartlar açıq OYNANILIR: Gözlənilən görüş Çində baş tutacaq?

"Azərbaycan Prezidenti İlham Əliyev ilə Rusiya Prezidenti Vladimir Putin arasında Çində görüşün keçirilməsi mümkün görünmür".

Politoloq Azər Qasımov bunu TodayPress TV-yə açıqlamasında deyib.

Onun sözlərinə görə, Azərbaycan və Rusiya arasındakı hadisələrin mahiyyəti onu deməyə əsas verir ki, iki ölkə arasında mövcud olan gərginlik köklü xarakter daşıyır:

"Məsələnin mahiyyəti ondan ibarətdir ki, Azərbaycana məxsus sərnişin təyyarəsinin vurulması ilə başlayan proseslərin kökündə uzun illər qapalı qalan, lakin gec-tez üzə çıxması qaçılmaz olan gerçəkliklər dayanır. Bunun ilk səbəbini Azərbaycan Prezidenti İlham Əliyev “Əl-Ərəbiyyə” kanalına verdiyi müsahibəsində qeyd etdi. O bildirdi ki, Rusiya 1920-ci ildə Azərbaycanı işğal edib və Zəngəzuru – bizim “Qərbi Zəngəzur” adlandırdığımız ərazini Azərbaycandan alıb Ermənistana verib. Göründüyü kimi, iki ölkə arasındakı gərginliyin kökləri çox qədimə gedib çıxır. Sonrakı proseslər – müstəqillik dövründə Azərbaycan ərazilərinin işğalında Rusiyanın rolu, 1990-cı il “20 Yanvar” faciəsi, Xocalı soyqırımında Rusiyanın 366-cı motoatıcı alayının iştirakı və digər hadisələr də göstərir ki, məsələnin kökündə Rusiyanın Azərbaycana qarşı düşmən mövqeyi dayanır. Belə bir durumda artıq bütün kartlar açıq oynanılır və Rusiya Azərbaycana qarşı həyata keçirdiyi tarixi düşmənçilik faktlarının cavabını verməlidir. Bununla yanaşı, Rusiya hələ də vurduğu təyyarə ilə bağlı Azərbaycanın tələblərini yerinə yetirməyib".

Siyasətçi Çində liderlər arasında ikitərəfli görüşün baş tutmasını real hesab etmir:

"Hesab edirəm ki, bu cür analitik yanaşmadan sonra Azərbaycan Prezidenti ilə Rusiya Prezidenti arasında görüşün keçirilməsi mümkün görünmür. Belə bir görüş barədə hər hansı anons da yoxdur. Tədbir zamanı yalnız təsadüfən iki ölkə rəhbərinin qısa qarşılaşması baş verə bilər, amma ikitərəfli görüşün keçiriləcəyini real hesab etmirəm".

A.Qasımov Ermənistanın Baş naziri Nikol Paşinyan ilə Rusiya Prezidenti Vladimir Putin arasında görüşün baş tutması ehtimalını isə mümkün hesab edir. Onun qənaətincə, Paşinyan özü buna can atır.

Qeyd edək ki, hazırda Azərbaycan Prezidenti İlham Əliyev, Rusiya Prezidenti Vladimir Putin, Ermənistanın Baş naziri Nikol Paşinyan və digər ölkə liderləri Şanxay Əməkdaşlıq Təşkilatının (ŞƏT) sammitində iştirak etmək üçün Çində səfərdədilər.

Qiymət Mahir