Alimlərdən xərçəng xəstələrinə müjdə: İdman zəifləmiş immun sistemini dirçəldir

Müntəzəm fiziki aktivlik piylənmənin zəiflətdiyi immun müdafiəni qismən bərpa edə bilər.

TodayPress TV xəbər verir ki, "Roswell Park" Kompleks Xərçəng Mərkəzinin alimləri müntəzəm fiziki aktivliyin piylənmə səbəbindən zəifləmiş immun sisteminin şiş əleyhinə müdafiəsini qismən bərpa edə biləcəyini müəyyən ediblər.

Tədqiqatın nəticələri "Annals of Surgery" jurnalında dərc olunub.

Tədqiqatçılar xəstəliyin ən geniş yayılmış forması olan kiçik hüceyrəli olmayan ağciyər xərçəngini araşdırıblar. Siçanlar üzərində aparılan təcrübələrdə onlar piylənməsi olan və normal çəkidə olan heyvanları müqayisə edib, fiziki aktivliyin ağciyərlərdəki immun hüceyrələrə necə təsir etdiyini öyrəniblər.

Müntəzəm fiziki aktivliklə məşğul olan siçanlarda şiş əleyhinə immun reaksiyanı zəiflədən tənzimləyici T-hüceyrələrinin sayı daha az, xərçəng hüceyrələrini məhv edə bilən CD8+ T-limfositlərinin sayı isə daha çox olub. Belə şəraitdə şişlər əhəmiyyətli dərəcədə daha yavaş böyüyüb.

Bu təsir piylənməsi olan heyvanlarda da müşahidə edilib ki, bu da fiziki aktivliyin artıq çəkinin immun sisteminə mənfi təsirini qismən kompensasiya edə biləcəyini göstərir.

Daha sonra alimlər nəticələri insanlar üzərində də yoxlayıblar. Bunun üçün kiçik hüceyrəli olmayan ağciyər xərçəngi olan 73 pasiyentin şiş toxumasından götürülmüş nümunələri araşdırıblar. Fiziki cəhətdən aktiv iştirakçılarda da şiş əleyhinə müdafiəni zəiflədə bilən immun hüceyrələrinin daha az olduğu müəyyən edilib.

Müəlliflər qeyd edirlər ki, fiziki aktivlik xərçəng müalicəsini əvəz etmir, lakin müalicənin əlavə komponentinə çevrilə bilər. Onların fikrincə, bu yanaşma xüsusilə piylənməsi olan və şiş əleyhinə immun reaksiyası təbii olaraq zəifləmiş pasiyentlər üçün faydalı ola bilər.

Bundan əvvəl alimlər ağciyər xərçənginin erkən mərhələdə inkişafını “söndürən mexanizm” aşkar ediblər.

Qiymət Mahir