TDT mədəniyyət və turizm nazirlərinin 10-cu toplantısı keçirilir

Bu gün Türkiyənin paytaxtı Ankarada Türk Dövlətləri Təşkilatının (TDT) mədəniyyət və turizm nazirlərinin 10-cu toplantısı keçirilir

TodayPress TV xəbər verir ki, Türkiyənin Mədəniyyət və Turizm Nazirliyinin ev sahibliyi ilə təşkil olunan toplantıda TDT-yə üzv və müşahidəçi ölkələrin nümayəndə heyətləri rəhbərlərinin çıxışları dinlənilib.

Tədbirin açılışını Türkiyənin mədəniyyət və turizm naziri Mehmet Nuri Ersoy edib.

O bildirib ki, Türkiyənin paytaxtı qədim keçmişi, çox sayda muzeyi ilə həm ənənəvi, həm də modern sənətin bir arada yaşadılmasında önəmli rol oynayır. Bu səbəbdən də Ankara TDT çərçivəsində 2026-cı il üçün turizm paytaxtı elan olunacaq: "Gündəmdə olan məsələlərdən biri də budur".

TDT-nin Baş katibi Kubanıçbek Ömüralıyev çıxışında deyib ki, Türk dünyası bu beynəlxalq təşkilat səviyyəsində təkcə siyasət, iqtisadiyyat, təhsil, hüquq sahəsində deyil, mədəniyyət və turizm sahəsində də əməkdaşlığını genişləndirir.

Qeyd edək ki, bu tədbirdə Azərbaycanı Dövlət Turizm Agentliyinin sədri Fuad Nağıyev təmsil edir.