Azərbaycanla Mərakeş arasında münasibətlər müzakirə edildi
Milli Məclisin sədri Sahibə Qafarova ölkəmizdə keçirilən İslam Əməkdaşlıq Təşkilatına üzv dövlətlərin Parlament İttifaqının 20-ci sessiyasında iştirak edən Mərakeş Krallığı Nümayəndələr Palatası sədrinin müavini Mohamed Qayat ilə görüşüb.
Bu barədə TodayPress TV-yə Milli Məclisin Mətbuat və ictimaiyyətlə əlaqələr şöbəsindən məlumat verilib.
Görüşdə Azərbaycan ilə Mərakeş arasında münasibətlərin mövcud səviyyəsindən məmnunluq ifadə olunub. Bildirilib ki, qarşılıqlı hörmətə əsaslanan ikitərəfli əlaqələr, xüsusilə siyasi sahədə uğurla inkişaf edir. Tərəflər beynəlxalq təşkilatlar çərçivəsində əməkdaşlığın və qarşılıqlı dəstəyin əhəmiyyətini vurğulayıblar.
Söhbət zamanı parlamentlərarası əməkdaşlığın iki ölkə arasında münasibətlərin dərinləşməsində mühüm rol oynadığı qeyd edilib. S.Qafarova Mərakeşə rəsmi səfərini və müxtəlif beynəlxalq tədbirlər çərçivəsində mərakeşli həmkarları ilə keçirdiyi görüşləri məmnunluqla xatırlayaraq, bu təmasların əlaqələrin inkişafına töhfə verdiyini bildirib.
Görüşdə hər iki ölkənin parlamentlərində fəaliyyət göstərən dostluq qruplarının və cari ildə imzalanmış parlamentlərarası Anlaşma Memorandumunun əməkdaşlığın genişləndirilməsi üçün əlverişli imkanlar yaratdığı vurğulanıb.
Tərəflər parlamentlərin beynəlxalq parlament təşkilatlarında, o cümlədən Qoşulmama Hərəkatının Parlament Şəbəkəsi çərçivəsində əməkdaşlığından məmnunluqlarını ifadə ediblər. Qeyd olunub ki, Mərakeş təşkilatın fəaliyyətində fəal iştirak edir və onun işinə xüsusi önəm verir.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
