Zelenski diplomatik dalanda: Sülhün bədəli Ukraynanın torpaqları olacaq?
Ukrayna Prezidenti Volodimir Zelenski Fransa Prezidenti Emmanuel Makronla telefon danışığı aparıb.
Tərəflər diplomatik əlaqələrin gücləndirilməsi və Rusiyaya təzyiqin artırılması məsələlərini müzakirə edib, o cümlədən yaxın vaxtlarda görüşmək barədə razılığa gəliblər.
Bundan əvvəl isə oktyabrın 17-də Zelenski Ağ Evdə ABŞ Prezidenti Donald Trampla görüşüb.
Görüşdə Ukraynanın “Tomaqavk” raketləri ilə təmin edilməsi məsələsi gündəmə gəlsə də, Trampın münaqişənin gərginləşməsindən narahatlığı səbəbindən ehtiyatlı yanaşması diqqət çəkib.
Zelenski, həmçinin ABŞ-yə Ukrayna dronları müqabilində raket təklifi irəli sürüb, lakin hələ cavab almayıb.
Sözügedən mövzu ilə bağlı TodayPress TV-yə açıqlama verən politoloq Abutalıb Səmədov bildirib ki, Zelenskinin Trampla böyük ümidlərlə gözlənilən görüşü arzulanan nəticəni verməyib və uğursuz olub:
"Bunun səbəbi bir gün əvvəl Putinin Trampa zəng etməsi, onların arasında aparılan danışıqlar, Putinin verdiyi təkliflər və Budapeştdə yaxın iki həftə ərzində görüş keçirmək barədə razılığın əldə olunmasıdır. Məlumdur ki, Alyaskada da Trampla Putin arasında müəyyən razılaşmalar olmuşdu və Rusiya dəfələrlə bu razılaşmalara sadiq olduğunu bəyan edib. Bu şəraitdə Zelenski çox təəssüf ki, Trampın təcili müharibəni qurtarmaq istədiyi və bunun yolunu Rusiyanı dilə tutmaqda, müəyyən güzəştlərə razı salmaqda gördüyünü nəzərə almalıdır".
Ekspert danışıqların Ukraynanın xeyrinə olmadığını vurğulayıb:
"Son razılaşmaya görə, Ukrayna Dombası bütünlükdə Rusiyaya verməlidir və bunun qarşılığında Rusiya Xerson və Zaporojye vilayətlərindən imtina edə biləcəyini bildirib. Danışıqlardan əvvəl Trampın xüsusi nümayəndəsi Zelenski ilə görüşdə tələb edib ki, Ukrayna ərazi mübadiləsinə razılıq versin. Danışıqlar ərazi mübadiləsi nəticəsində müharibəni dayandırmaq və sülh sazişini imzalamaq əsasında aparılır. Burada Ukrayna neytrallığı barədə təminat verməli, NATO üzvü olmayacağını bəyan etməli və Putin ilə Trampın təklif etdiyi ərazi mübadiləsini qəbul etməlidir".
Analitikin qeyd edib ki, Fransanın Ukraynaya ciddi dəstəyi yoxdur:
"Digər müzakirə mövzularına isə rus dilinin Ukraynada statusu, Ukrayna ordusunun gələcəyi, təhlükəsizlik təminatı, sülhməramlı qüvvələr və s. daxildir. Makronun Zelenskiyə ciddi yardımı yoxdur və Fransa Ukraynaya ən az yardım edən dövlətlərdən biridir. Zelenski də anlayır ki, hərbi yolla torpaqlarını azad etmək şansı demək olar ki, qalmayıb. Trampla görüşdən sonra Zelenski bəyan edib ki, ərazilərdən imtina nə qədər ağır olsa da, belə bir addım atılmalıdır".
O, həmçinin əlavə edib ki, Zelenski sülhə məcbur ediləcək:
"Zelenskinin yetirdiyi yanlış siyasət son nəticədə bu vəziyyətə gətirib çıxarıb. Raketlərin yaxın vaxtlarda verilməsi mümkün deyil, ABŞ Ukraynaya ciddi hərbi yardım göstərmək fikrində deyil və nəyin bahasına olursa olsun, Zelenskini sülhə məcbur etmək istəyir. Budapeştdə Putinlə əldə olunan razılaşmanın Zelenskiyə qəbul etdirilməsi gözlənilir və o, başqa çarəsi olmadığı üçün müəyyən güzəştlərə getmək məcburiyyətində qalacaq".
Jalə Rövşən
FOTOLAR
