Xankəndidə yeni dövr: ECO Zirvəsi tarixi hadisəyə çevrildi

"Azərbaycan beynəlxalq və regional təşkilatlara üzv olmaqla yanaşı, çox zaman onların aparıcı dövləti kimi çıxış edir. Müxtəlif təşəbbüs və ideyalar irəli sürür, onların həyata keçirilməsi üçün mühüm platformalar yaradır. Hazırkı mürəkkəb şəraitdə, beynəlxalq münasibətlər sistemində nizamın dəyişdiyi bir zamanda Azərbaycanın bu təşəbbüsləri üzv olduğu təşkilatların yeni bir formada təqdimatına çevrilir və onların funksionallığını artırır".

Milli Məclisin deputatı Hikmət Babaoğlu bunu TodayPress TV-yə danışarkən deyib.

O qeyd edib ki, 2011–2013-cü illərdə Azərbaycanın BMT Təhlükəsizlik Şurasına rəhbərlik etməsi, COP29 tədbirinə ev sahibliyi etməsi, İslam Əməkdaşlıq Təşkilatı çərçivəsində irəli sürdüyü təşəbbüslər və bu tədbirlərin verdiyi səmərəli nəticələr ölkənin fəaliyyətini daha da cəlbedici edir:

"ECO Zirvə Toplantısının Xankəndində keçirilməsi isə iki mühüm aspektlə yadda qaldı. Birincisi, bu təşkilata üzv ölkələrin indiki mürəkkəb şəraitdə nəqliyyat və kommunikasiya baxımından iqtisadi əməkdaşlığı yenidən dəyərləndirməsi, mövcud potensialın təhlili və əlaqələrin dərinləşdirilməsi məsələsidir. İkincisi isə ondan ibarətdir ki, 2023-cü il sentyabrın 20-dək terror yuvası kimi tanınan Xankəndi bu dəfə dünyaya sülh və iqtisadi əməkdaşlıq məkanı olaraq təqdim olundu. Hər iki hadisə özlüyündə mühüm əhəmiyyət daşıyır.

Liderlərin görüşləri, davranışları və qarşılıqlı münasibətləri isə beynəlxalq ictimaiyyətə verilən mühüm siyasi mesaj idi. Çünki bu gün təhlükəsizlik konsepsiyalarına nəzər saldıqda görürük ki, milli təhlükəsizlik yalnız hərbi deyil, eyni zamanda iqtisadi, siyasi, diplomatik komponentlərdən ibarətdir. Belə olan halda, zirvə çərçivəsində nümayiş olunan münasibətlər ölkələrarası əlaqələrin indiki vəziyyəti və gələcək perspektivləri barədə əhəmiyyətli siqnallar verir".

Deputat həmçinin liderlərin görüşündən bəhs edib:

"Liderlərin səmimi və isti münasibətləri, xüsusilə Türkiyə, Azərbaycan və Pakistan arasındakı qardaşlıq münasibətlərinə İran Prezidentinin də Xankəndidə qoşulması diqqətdən yayınmadı. Bu fakt özlüyündə ayrıca siyasi hadisə kimi dəyərləndirilə bilər. Çünki İranla bağlı müxtəlif məsələlər daim fərqli istiqamətlərdə şərh olunur. Bu münasibətlərin yaxşılaşmasını istəməyən qüvvələr – başda Ermənistan və Rusiya olmaqla – mövcuddur. Belə bir şəraitdə İran Prezidentinin bu strateji ailəyə isti mesajlarla qatılması yeni bir siyasi görüntü formalaşdırdı.

Bütün bu məqamlar üzv ölkələrin bölgədə nə qədər əhəmiyyətli və tarixi rol oynamaq imkanına malik olduğunu nümayiş etdirdi. Məhz bu səbəbdən ECO Zirvə Toplantısı sözün əsl mənasında tarixi bir hadisəyə çevrildi".

Qeyd edək ki, İyulun 4-də Xankəndi şəhərində İqtisadi Əməkdaşlıq Təşkilatının (ECO) 17-ci Zirvə görüşü keçirilib.

Qiymət Mahir