Belarus səfiri: İki ölkə arasında əməkdaşlığın coğrafiyası Qarabağa qədər genişlənib
Bakıda Belarus Respublikasının Müstəqillik Günü münasibətilə rəsmi qəbul keçirilib. Tədbirdə çıxış edən Belarusun Azərbaycandakı fövqəladə və səlahiyyətli səfiri Dmitri Pineviç iki ölkə arasında strateji tərəfdaşlığın inkişafından, iqtisadi əməkdaşlığın genişlənməsindən və turizm potensialından danışıb.
TodayPress TV xəbər verir ki, səfir çıxışında Belarusun turizm imkanlarına toxunaraq bildirib ki, ölkə birtərəfli qaydada 76 dövlətin, o cümlədən Avropanın 38 ölkəsinin vətəndaşları üçün vizasız giriş rejimi tətbiq edib.
Onun sözlərinə görə, təkcə ötən il bu imkandan 225 min avropalı istifadə edib.
Dmitri Pineviç Azərbaycan və Belarus arasında əməkdaşlığın dinamik inkişaf etdiyini vurğulayaraq bildirib ki, prezidentlər Aleksandr Lukaşenko və İlham Əliyevin rəhbərliyi ilə ölkələr arasında strateji tərəfdaşlıq daha da möhkəmlənir.
“Ölkələrimiz arasında siyasi dialoq, humanitar əlaqələr və birbaşa regional təmaslar inkişaf edir. Bu isə qarşılıqlı ticarət dövriyyəsinin artmasında və birgə kooperasiya layihələrinin sayının çoxalmasında öz əksini tapır”, – deyə səfir bildirib.
Peşəcə həkim olduğunu xatırladan diplomat Belarusun tibbi turizm sahəsində də mühüm imkanlara malik olduğunu qeyd edib.
“Belarusda istirahətin üstünlüklərindən biri onun peşəkar müalicə ilə birləşdirilməsidir. Hər il 170 mindən çox xarici vətəndaş bu məqsədlə ölkəmizə müraciət edir”, – deyə o bildirib.
Səfir əlavə edib ki, Belarusda sənaye turizmi də sürətlə inkişaf edir. Hazırda 130 müəssisə, o cümlədən BelAZ, MTZ və MAZ turistlərin üzünə açıqdır. Onun sözlərinə görə, məhz bu müəssisələr Azərbaycan və Belarus arasında sənaye kooperasiyasının yüksək səviyyəsini nümayiş etdirir.
Dmitri Pineviç ötən il ərzində iki ölkə arasında intensiv siyasi və iqtisadi təmasların həyata keçirildiyini diqqətə çatdırıb. O bildirib ki, hökumət başçılarının, baş nazir müavinlərinin, hökumətlərarası komissiyaların həmsədrlərinin, Belarus Milli Assambleyası Nümayəndələr Palatası sədrinin və bir sıra nazirlik nümayəndələrinin qarşılıqlı səfərləri baş tutub. Bundan əlavə, biznes dairələrinin nümayəndələri tərəfindən 40 qarşılıqlı səfər təşkil edilib.
Səfir vurğulayıb ki, birgə layihələrin coğrafiyası demək olar ki, bütün Azərbaycanı əhatə edir.
“Bu layihələr Bakı, Gəncə və Sumqayıtdan Şəki, Qəbələ, Ağdam, Xankəndi və bütövlükdə Qarabağa qədər geniş əraziləri əhatə edir”, – deyə diplomat qeyd edib.
Çıxışında Belarus nümayəndə heyətinin Ümumdünya Şəhərsalma Forumunda iştirakını da xatırladan səfir forumun yüksək səviyyədə təşkil olunması münasibətilə Azərbaycanı təbrik edib.
O, nümayəndə heyətinə göstərilən qonaqpərvərliyə görə təşəkkürünü bildirib və forumun diplomatik korpus tərəfindən də yüksək qiymətləndirildiyini vurğulayıb. Eyni zamanda, Azərbaycan Xarici İşlər Nazirliyinin himayəsi altında diplomatik korpusun birgə fəaliyyətinə görə minnətdarlığını ifadə edib.
Qiymət Mahir
